Ezimnyama kungasongwa isizini zibomvu imali uma zinganqoba kusasa



Kolunye uhlangothi ezikaTruter zibheke ukuqopha umlando
Kuzoshikisha ufudu kowamanqamu weNedbank Cup kusasa ngo-6 ebusuku phakathi kwe-Orlando Pirates neSekhukhune United eLoftus Versfeld Stadium, ePitoli.
Lo mdlalo uzobe ubhekwe ngamehlo abomvu ngenxa yezizathu ezahlukene. Yingakho intatheli yelaboHlanga isibhekela izizathu ezine ezizokwenza lo mdlalo uhlabahlose.
IPirates ibheke isicoco sesibili
IPirates ivele isiphethe isicoco seMTN8 esithole ngemuva kokuqumba phansi AmaZulu FC kowamanqamu ekuqaleni kwesizini eMoses Mabhida Stadium, eThekwini. Leli qembu likhale lemuka nesamba sika-R8 million.
INedbank ihambisana nezigidi eziyisikhombisa. Ngokuqeda endaweni yesibili, eZimnyama zizohlomula ngo-R7, 5 million. IPirates isethubeni lokuqeda isizini no-R22, 5 million uma inqoba iNedbank ngempelasonto.
ISekhukhune noBrandon Truter
ISekhukhune iyaqala ukufinyelela kowamanqamu emlandweni wayo kusukela yasungulwa.
Leli qembu linqobe isicoco salo sokuqala esigabeni esikhokhelayo lizibekisela indawo kuDSTV Premiership ngokudla umhlanganiso kuGladAfrica Championship. Kusasa isethubeni lokunqoba isicoco sayo sokuqala kusukela inyukele esigabeni esiphezulu.
Abadlali nokuqeda ishobolo
UDaniel Cardoso
Kusukela eqale ukudlala esigabeni esikhokhelayo akakaze asinqobe isicoco. Ugijime kuKaizer Chiefs amasizini ayisikhombisa. Uze wahamba engakaze asinqobe isicoco.
Ubekhona iChiefs idliwa yiMamelodi Sundowns ngo 3-1 kuTelkom Knockout eMoses Mabhida Stadium, eThekwini.
Ubeyingxenye yabadlali beChiefs abaguqiswe yi-Ajax Cape Town kowamanqamu weMTN8 eNelson Mandela Bay Stadium, eGqeberha. Ngowezi-2019, ubekhona futhi iChiefs ithelwa ngehlazo yiTS Galaxy FC.
USiphosakhe Ntiyantiya
Ukhulele enkulisa yeChiefs. Ngowezi-2019, ubedlala kwiChiefs imangazwa yiTS Galaxy kowamanqamu weNedbank Cup.
UKamohelo Mokotjo:
Usheshe wahamba kuSuperSport United engakaze ayiphakamise inkomishi. ENingizimu Afrika, le njini isathungatha isicoco sayo sokuqala.
USipho Chaine:
Ufike kwezwakala ku-Orlando Pirates. Njengamanje uselenze elakhe ijezi likanozinti. UChaine usathungatha isicoco sakhe sokuqala.
IPirates isike yagilwa
Ngowezi-2013
IPirates yagilwa yiPlatinum Stars amahlandla amabili elandelana. Yaqala yaguqiswa yiDikwena kowamanqamu weMTN8 eMoses Mabhida Stadium. Kuthe kusabatshazwa lokho yaphinde yagilwa yiqembu elifanayo kowamanqamu weTelkom Knockout.
Ngowezi-2018, iPirates iqunjwe phansi yiBaroka FC kowamanqamu weTelkom Knockout eNelson Mandela Bay.
Indlela ebheke kweyamanqamu
Orlando Pirates:
Last 32:
Pirates 2-0 All Stars
Last 16:
Pirates 2-1 Venda Football Academy
Quarterfinal:
Pirates (1) 5-4 (1) Dondol Stars
– Inqobe kumaphenathi.
Kowandulela amanqamu:
Pirates 2-1 K.Chiefs
EZimnyama ngaphambi komdlalo:
U-Innocent Maele ongukaputeni exoxa nabezindaba:
“Sihlelele noma yisiphi isimo esingabhekana naso emdlalweni. Sizolindela noma yini. Sizobe sihlelile uma behlasela zisuka kanti sizobe siqaphelile futhi uma behlasela sakuzumisa. Lona ngumdlalo esifuna ukuwunqoba.”
Sekhukhune United:
Last 32:
Sekhukhune 6-0 Live Brothers
Last 16:
Sekhukhune United 2-0 Cape Town Spurs
Quarterfinal:
Sekhukhune United 2-1 Chippa United
Kowandulela amanqamu:
Sekhukhune (0) 4-3 (0) Stellenbosch
Sekhukhune ngaphambi komdlalo:
UKamohelo Mokotjo odlala esiswini exoxa nabezindaba:
“Kuhle ukunganakwa. Lokhu akukhathaleli ukuthi ubhekene nasiphi isimo. Kumele singatatazeli, senze esikwaziyo bese sidlala ngokukhululeka. IPirates sidlalile nayo. Iyazi uhlobo lweqembu esiyilona. Silwa kuzbe kube yisekugcineni. Sesikwenze konke. Sizibekisele indawo kuTop 8 saphinde sathola ithikithiki lokuyodlala e-Afrika. Ngakho kumele sidlale ngokukhululeka.”