EzikaMane sezibheke ukungena emabhukwini omlando

ISenegal ibhekene nejoka lokuzifaka ohlwini lwamazwe akhethekile emlandweni we-Africa Cup of Nations (Afcon).

Amabhubesi aseTheranga yiwona avikela isicoco se-Afcon. Namuhla ngehora le-10 ebusuku azobhekana nosokhaya i-Ivory Coast emdlalweni we-last 16 yalo mqhudelwano omkhulukazi webhola e-Afrika eStade Charles Konan Banny de Yamoussoukro.

ISenegal yilona kuphela izwe elisanqobe imidlalo emithathu ilandelana kulo mqhudelwano. Ibhaxabule iGambia ngo 3-0 kowokuvula kwathi kowesibili yathela othulini Cameroon ngo 3-1. Kowokugcina icoboshise iGuinea ngo 2-0.

Namuhla ebusuku kubhekwe ukuthi iqhubeke nomgqigqo ofanayo. Ama-Elephants(Ivory Coast) ayaxhuga . Adlulele esigabeni somkhumulajezi ngomcicimezelo. Angene ngonkosi sikelela. Ilotsholwe yi-Ivory Coast ngo 4-0 emdlalweni wokugcina wamaqoqo ku-Afcon.

ISenegal igaqele isicoco sayo sesibili. Ngowezi-2021, iguqise elaseGibhithe kowamanqamu sekukhahlelwa amaphenathi.

Wonke amehlo asethe njo kuwona Amabhubesi aseTheranga abheke ukuba yizwe lesine ukuvikela i-Afcon. IGibhithe, iGhana neCameroon yiwona amazwe aseke avikela isicoco se-Afcon phambilini.

ElaseGibhithe selikwenze lokho amahlandla amathathu. Lakwenza okokuqala ngowe-1959. Laba yizwe lokuqala ukunqoba lomqhudelano ngesikhathi uqala ngowe-1957.

Likuphindile lokho liwunqoba ngowezi-2006, 2008 nango-2010. IGhana yona yaba ngompetha amahlandla elandelana ngowezi-1963 nangowezi-1965.

Izwe lesithathu ukuzifaka kula mazwe akhethekile kwaba yiCameroon ngowezi-2000 nangowezi-2002.

Selokhu kwagcina ngelaseGibhithe ngowezi-2010 kwelase-Angola alikho elinye izwe eselike lavikela isicoco salo kule minyaka eyishumi nane eyedlule.

IZambia, Nigeria, Ivory Coast, Cameroon ne-Algeria bonke bahluleke bancame kule minyaka eyedlule wukuvikela izicoco zawo.

Inselelo isibhekene neSenegal ekutheni iqede leli shobolo bese iba yizwe lesine ukuvikela isicoco se-Afcon.