UZwane uzolwela ukuvikela irekhodi lakhe emdlalweni womkhaya
Inejoka lokuqeda isinyama sokuphenduka ukudla kwenduku emidlalweni yabakhaya i-Orlando Pirates ezongqubuzana neKaizer Chiefs kowandulela amanqamu eNedbank Cup. Umdlalo uzoqala ngehora lesithathu kusasa eFNB Stadium, eSoweto, eGoli. Kubhekwe ukuthi uthanyelwe yizinkumbi zabalandeli. Intatheli yelaboHlanga uZipho Singela isihlaziyela lendumezulu yomdlalo obhekwe ngamehlo abomvu.
Amaphuzu amane azokwenza umdlalo uhlabahlose.
Ibhakaniya nenselelo yokuqeda ishobolo:
EZimanyama zibhekene nengcindezi yokuqeda ishobolo lokubhakabulwa Amakhosi kweyabakhaya. Kule sizini, iChiefs ivele isiyibhambabule amahlandla amabili iPirates emidlalweni yeligi. Emzuliswaneni wokuqala Izimpofana zinqobe ngo-1-0 wegoli likaYusuf Maart.
Emzuliswaneni wesibili kuphinde kwakhonya Amakhosi ephumelela ngo-1-0 kulandela ukuthi u-Olisah Ndah egwaze umkhonto ekhaya. EzikaMagebhula sekuphele iminyaka emibili zihluleka wukuqumba phansi Izimpofana kweyabayakhaya.
IChiefs isinqobe imidlalo emihlanu yabakhaya ilandelana kule minyaka emibili eyedlule. IPirates selokhu yagcina ukunqoba umdlalo wabakhaya ngoMasinga wezi-2021.
IChiefs ifuna ukuqeda amashobolo:
Amakhosi sekuphele amasizini ayisishiyagalombili ephikwa yizinkomishi okuyisomiso eside kunazo zonke emlandweni waleli qembu.
Leli qembu elizakhele udumo ngokuzitamuzela ngezicoco eminyakeni eyedlule sekuphele amasizini amane lingafinyeleli kweyamanqamu emiqhudelwaneni yasekhaya kwazise lidliwe kowamanqamu weCaf Champions League kumasizini amabili adlule.
Ekhaya lagcina ukufika kowamanqamu mhla ligilwa yiTS Galaxy FC eMoses Mabhida Stadium, eThekwini ngowezi-2019 kowamanqamu wayo iNedbank Cup liholwa ngu-Enerst Middendorp odabuka kwelamaJalimane. Kusukela lapho alikaze liphinde lifinyelele kweyamanqamu ekhaya.
Ngowezi-2019, iChiefs yaguqa ngo-1-0. Kulokhu inelinye ithuba lokuzitholela ithikithi elibheke kowamanqamu.
UZwane ulwela ukuvikela irekhodi lakhe kweyabakhaya:
Selokhu ethathe izintambo ngokugcwele njengomqeqeshi weChiefs usayizwa ngendaba induku kweyabakhaya. Kule sizini useyiqumbe phansi izikhawu ezimbili iPirates. Ngakolunye uhlangothi uJose Reveiro usathungatha iwini yakhe yokuqala kweyabakhaya. Kulokhu uzobe ebheke ukuphendula amatafula bese ezibekisela indawo kowamanqamu okwesibili kule sizini.
Ithuba lokubuyela e-Afrika kwawaseSoweto:
Iqembu elizodla ubhedu kulo mqhudelwano lizothola ingqayizivele yokuyodlala kuCaf Confederation Cup. Womabili la maqembu avele abanga indawo yesibili neyesithathu kweyeligi. Ozoqeda endaweni yesibili uzojoyina iSundowns kuChampions League bese kuthi oqeda kweyesithathu aye kodlala kuConfederation Cup.
