Kubanjwe imithi ingeniswa kuleli ngokungemthetho
Ukuthamba kwesandla emingceleni yakuleli namazwe angomakhelwane kuphinde kwahlala obala ngesikhathi kuvundululwa inqwaba yemithi ebisuka eSwatini ishushumbiselwa kuleli ngokungemthetho ngempelasonto.
Iloli ebelishayelwa owesilisa oneminyaka engama-31 waseSwatini lifinjwe emngceleni i-Oshoek lingena kuleli. Kuthe uma amaphoyisa elisesha kwatholwa inqwaba yemithi ehlukahlukene. Sekuyinsakavukela ukushushumbiswa kwempahla ingena noma iphuma kuleli ngokungemthetho.
Eyezimoto eziphakeme ezebiwa kuleli zeqiswe imingcele ziyofihlwa eMozambique, eZimbabwe nakhona eSwatini sekujwayelekile. UNgqongqoshe Wamaphoyisa uMnu uBheki Cele sekukaningi ethi uzoxoxisana nozakwabo kula mazwe ngalolu hlobo bobugebengu, kepha kujike kucwebe iziziba.
UNgqongqoshe Wezasekhaya uDkt u-Aaron Motsoaledi nguye osabonakala emile ekutheni uma zingaqiniswa ezokuphepha emingceleni ubugebengu busazoqhubeka.