Ukunqoba kweBafana namuhla kungasho ukuzethula umthwalo we-Afcon
Ngemuva kwekhefu lemidlalo yamazwe indlela yeBafana ebheke ku-Africa Cup of Nations (Afcon) izobe isicace kuhle kwekati elimhlophe ehlungwini.
IBafana izoshukana neLiberia namuhla (NgoLwesihlanu) ngelesi-6 kusihlwa e-Orlando Stadium, eSoweto, emdlalweni omqoka wokuhlungela ukuzibekisela indawo ku-Afcon.
Ngemuva komdlalo owodwa, iBafana ayinalo iphuzu. Iguqiswe yiMorocco ngo 2-1 ekuhambeni ngonyaka odlule.
NgoLwesibili, iBafana izogadulisana neLiberia ekuhambeni ngo-6 kusihlwa. UZipho Singela usibhekela amaphuzu amahlanu enza lemidlalo ibemqoka kuBafana noHugo Broos ongumqeqeshi weqembu lesizwe.
Ikusasa likaBroos lisengcupheni kuBafana:
Ngesikhathi uBroos ehluleka wukutholela iBafana ithikithi elibheke eNdebeni yoMhlaba ebisingethwe yiQatar ngonyaka odlule walibeka ngembaba elokuthi uma iBafana iphuthwa yithuba lokuyodlala ku-Afcon uzozibeka phansi izintambo zokucija iqembu.
Le midlalo emibili izocacisa ngendlela yeBafana ebheke ku-Afcon. Uma uBroos ehluleka wukuthola imiphumela kule midlalo kuzobeka ikusasa lakhe engcupheni.
Yingakho edinga amaphuzu ayisithupha kule midlalo ukuze aqinisekise ikusasa lakhe njengomqeqeshi weBafana kungenjalo izinyawo zizogcwala udaka.
Imbudlu yamagoli eNingizimu Afrika:
Amazwe amabili azoqeda phezulu eqoqweni leBafana yiwona azozibekisela indawo ku-Afcon. IMorocco iyona eqhwakele ngamaphuzu ayisithupha ngemuva kwemidlalo emibili. Iqumbe phansi iBafana neLiberia emidlalweni yayo emibili yokuqala.
IBafana idinga ukunqoba ngenqwaba yamagoli e-Orlando ukuze izokwazi ukudlalela iphuzu ekuhambeni. Uma inqoba ngo 3-0 lokho kuzosho ukuthi uma ingathola iphuzu ekuhambeni izohlala endaweni yesibili ngamaphuzu amane nomehluko wamagoli amabili bese kuthi eyeLiberia ibe ngumehluko wamagoli amanye.
Kowokugcina uma isimo sikanje kuzosho ukuthi iLiberia idinga ukunqoba kuMorocco ngenqwaba yamagoli bese ihlalela ethembeni lokuthi neMorocco ishaye imbudlu uma isibhekene neBafana eNingizimu Afrika.
Umgqigqo omuhle ekhaya:
Selokhu uBroos ethathe izintambo zokucija iBafana elakuleli elikaze lishaywe ekhaya. Kweyokuhlungela iNdebe yoMhlaba lishaye iGhana, i-Ethiopia neZimbabwe. Nakulokhu iBafana kuzomele ilwele ukuyinqoba yomibili imidlalo yayo yasekhaya.
Amaphuzu amathathu azoyibekisela indawo ku-Afcon ngonyaka ozayo e-Ivory Coast. IBafana kuzomele iqale ngeLiberia ngoLwesihlanu.
Ithuba lokuziveza kwabazobanga umklomelo womdlali ovelele kuPSL:
UMonnapule Saleng noCassius Mailula bazothola ithuba lokuziveza kwelesizwe. Bobabili bavutha bengabaselwe emaqenjini abagijima kuwona. UMailula uwuqanduqandu kuSundowns. Usehlohle amagoli ayisishiyagalolunye wakha amagoli amathathu emidlalweni eli-14 yeligi kule sizini. NakuCaf Champions League akabambeki. Usebasele enethini amagoli amahlanu wakha elilodwa emidlalweni eyisikhombisa. Ngakolunye uhlangothi uSaleng usevalele enethini amagoli ayisishiyagalombili wakha amane emidlalweni eli-15 yeligi. Bobabili kubhekwe ukuthi benze lemilingo abayenza emaqenjini abo uma sebegqoke ijezi lesizwe.
Kumele kusetshenzwe kusakhanya:
IBafana inerekhodi elingelihle lokuhluleka wukumelana nengcindezi emidlalweni yokugcina futhi emqoka. Yingakho kumele isheshe izikhanyisele indlela ebheke e-Ivory Coast. Ngonyaka odlule ihlulekile wukuzitholela iphuzu kowokugcina ibhekene neGhana ekuhambeni. IBafana yayidinga iphuzu ukuze izibekisele indawo emzuliswaneni wokugcina wokuhlungela eyoMhlaba ebiseQatar. UBroos nezakhe bakuqonda kahle ukuthi kumele banqobe ekhaya nasekuhambeni kuLiberia ukuze bazehlisele umthwalo.