Ofishi abakhulu kungenzeka bagingwe ngabancane nakulokhu kuNedbank
Impumelelo yeDondol yenza kube lukhuni satshe ukuba khona kweqembu elithi lingaqubula indebe
Aqhathiwe amaqembu ayisishiyagalombili azotholana phezulu kumaquarterfinal eNedbank Cup.
Umdlalo ozobhekwa ngamehlo abomvu kulesi sigaba ngophakathi kweDondol Stars yasePitoli ezoshukana ne-Orlando Pirates khona eGoli.
IPremier Soccer League (PSL) isazozimemezela izinkundla nezinsuku okuzodlalwa ngazo le midlalo.
Okwenza umdlalo weZimnyama neDondol (osesithombeni) udonse amehlo ezinkumbi zikanobhutshuzwayo yidumela laleli qembu elidlala ku-ABC Motsepe League esifundazweni saseGoli. IDondol imangaze inqwaba ibhincisela nxanye iSuperSport United ku-last 32 yalo mqhudelwano. Kuthe kusabatshazwa lokho yathela othulini AmaZulu ngo 6-5 sekukhahlelwa amaphenathi.
Ngabe leli qembu lizoqhubeka nokugila amaqembu agijima kuDStv Premiership? UZipho Singela oyintatheli yelaboHlanga ubheka izigameko ezinhlanu lapho amaqembu agijima esigabeni esiphezulu ake agilwa ngamaqembu agijima ezigabeni eziphansi.
1. Mhla zingama-23 kuNhlolanja ngowezi-2013:
Maluti FET College 4-1 Orlando Pirates: IBhakabhaka yangena ngaphansi kwelikhulu ihlazo ngaphansi kobuholi bukaRoger De Sa. Yanenebulwa yiMaluti FET eyayidlala ku-ABC Motsepe League. Kulo mdlalo kulapho uThembinkosi Lorch azibonakalisa khona okwaholele ekutheni agcine esayine kweZimnyama. IPirates yayibophele zonke izinsephe zayo kulo mdlalo okubalwa kuzona oHappy Jele, Oupa “Ace” Manyisa, Andile “Gattuso” Jali noSenzo Meyiwa ongasekho emhlabeni.
Ngonyaka ofanayo iPirates yafinyelela kowamanqamu weCaf Champions League. Nokho iMaluti yavuka umbhejazane yafaka iPirates ngaphansi kwelikhulu ihlazo iyilobola ngalesi sibalo samagoli.
2. Mhla ziyishumi nesishiyagalolunye kuNhlaba ngowezi-2019:
TS Galaxy FC 1-0 Kaizer Chiefs: Namanje iRockets iyona esaphethe umlando wokuba yilona kuphela iqembu elidlala esigabeni esiphansi eselake lakhala lemuka nesicoco seNedbank Cup. Akekho owayezitshela ukuthi iChiefs ingaguqiswa yiGalaxy ngo-2019 eMoses Mabhida Stadium, eThekwini. UZakhele Lepasa nguyena owaba yiqhawe leGalaxy evalela enethini iphenathi ngomzuzu wokugcina kulandela ukugingqwa ebhokisini nguTeenage Hadebe. IChiefs bekwaziwa ukuthi ayigayelwa mphako kweyamanqamu ikakhulukazi eThekwini. Kusukela kudala Amakhosi ayivulela induku uma eseThekwini. Ngo-2019, izinto zagaya ngomunye umhlathi. Kusukela lapho iChiefs ayikaze iphinde iyiphakamise iNdebe noma ifinyelele kowamanqamu selokhu yagilwa yiGalaxy.
3. Mhla zingama-21 kuMbasa ngowezi-2013:
Baroka 2-1 Kaizer Chiefs: IChiefs yaphenduka undabuzekwayo ngowezi-2013 imangazwa yiBaroka FC ePeter Mokaba Stadium, ePolokwane, eLimpopo. Kulo mdlalo uKnowledge Musona wabeka Izimpofana phambili ngomzuzu wama-36. USam Ndlovu washaya elokulinganisa ngowama-44 kwathi ngoka-90, uThobani Mncwango wabasela enethini elokunqoba. Namanje uma kukhulunywa ngezimanga zeNedbank indaba yalo mdlalo ayisali ngaphandle.
4. Mhla ziyisishiyagalombili kuNhlolanja ngowezi-2023:
Dondol Stars 2-1 SuperSport United: Isiphenduke inkathazo kuNedbank Cup kulo nyaka iDondol Stars ebhubhisa amaqembu agijima kuDStv Premiership kuNedbank Cup. IDondol igijima ku-ABC Motsepe League eGoli. Iguqise iSuperSport ngamabili kwelilodwa kuLast 32 kwathi kuLast 16 yakhipha Usuthu iludla ngayisithupha kwamahlanu sekukhahlelwa amaphenathi ngemuva kokuthi umdlalo uphele zibambene ngelilodwa. Kumma-quarterfinal itomule eZimnyama.
5. Mhla zingama-29 kuNdasa ngowezi-2009:
University of Pretoria 4-3 Kaizer Chiefs: IChiefs kudala yaqala ukugileka kulo mqhudelwano. Ngowezi-2009, yathelwa ngehlazo lika 4-3 amaTuks ayedlala kuNational First Division (NFD) esiyaziwa ngeMotsepe Foundation Championship. Kulo mdlalo owayengukaputeni weChiefs, uJimmy Tau wagileka igoda eshiywa nguPenyo Mongalo ekhala ngokuthi uzwe kukhala indweba. Wasala emile, uMongalo wafika walivalela enethini.
Aqhathwe kanje amaqembu kuma-quarterfinal:
Dondol Stars v Orlando Pirates
Royal AM v Kaizer Chiefs
Stellenbosch v Mamelodi Sundowns
Chippa United v Sekhukhune United