Ongaphansi nongaphezulu kwiNehawu noMnyango Wezempilo
Kubukeka kungongaphansi nongaphezulu phakathi kwenyunyana yabasebenzi bakahulumeni iNational Education Health and Allied Workers Union (Nehawu) noMnyango Wezempilo kuZwelonke njengoba ingekho evuma ukugoba uphondo kubona.
NgoMsombuluko uNgqongqoshe woMnyango uDkt uJoe Phaahla uphinde wanikela Enkantolo Yabasebenzi efuna ukuba izinkulungwane zabasebenzi abatelekile ezibhedlela nasemakliniki zibuyele emsebenzini ngempoqo. Ngakolunye uhlangothi iNehawu ithi lingawa licoshwe izinkukhu, angeke amalungu ayo abuyele zingakafezwa izimfuno zawo. Inkantolo Yabasebenzi inqume ukuthi bonke babuyele emsebenzini ngoLwesibili. Iphinde yathi abasebenzi abasesitelekeni kumele bapheze ukuhlukumeza nokusabisa labo abatelekile, futhi bangalinge bazame ukubakhipha emsebenzini.
Le nyunyana isola uMnyango Wezempilo ngokugxambukela. Ithi isiteleka esabasebenzi bakahulumeni, akusona esabasebenzi bezempilo ngakho umnyango awukwazi ukuphendula ezimfunweni zabo. Abamele iNehawu bathi ukunyuswa kwamaholo abakufunayo bakufuna kumqashi okunguhulumeni, hhayi umnyango othile ngaphansi kukahulumeni.
Izolo ekuseni abasebenzi basabise ngokuthi bazokwenza kungasebenzeki ngisho nasemakhazeni kahulumeni uma umqashi eqhubeka nokuqinisa ikhanda. Izolo ekuseni bese iqalile ukuzwakala imibiko yokushuba kwesiteleka ezingxenyeni ezahlukene. Nezinye izinhlangano njengeSouth African Communist Party (SACP) eGoli zikhiphe isitatimende zithi ziyayeseka iNehawu. Kukhona ukukhuluma okuthi uma lesitekeka siqhubeka kuze kube uMsombuluko okuwusuku okubhekwe ukuthi kuphazamiseke izinto ezithile ezweni, kubukeka bebaningi abangaseseka.
Lo mkhankaso wokumisa yonke into ezweni ugqugquzelwa i-Economic Freedom Fighters (EFF). Phakathi kokunye umholi we-EFF uMnu uJulius Malema uthi uMengameli uRamaphosa wehlulekile ukuphatha ngendlela ayeyithembise isizwe, ngakho kumfanele ukwehla esikhundleni. UMalema uveza nokuthi udaba lwasePhala Phala yilo olwembule uRamaphosa izinqe.