IMelika ibona uXi Jinping ezohlomisa iRussia ngasese
UMengameli waseChina uXi Jinping uhlela ukuvakashela eRussia maduze-nje ngesonto elizayo, kusho abantu abajwayelene nalolu daba ngoMsombuluko, kanti iMoscow neKyiv bobabili babike ukulwa okushubile empini eyachitha igazi eliningi esedolobheni elisempumalanga iBakhmut.
Ukuvakasha kukaXi ngesonto elizayo, ezinsukwini ngemuva kokuthola ihlandla lesithathu njengomholi waseChina, kuzofika ngokushesha kunalokho obekulindelwe ngaphambili. UMengameli waseRussia uVladimir Putin, osevele wamemela uXi esidlangalaleni eMoscow ngaphandle kokucacisa usuku, kungenzeka akuveze njengokukhombisa ukweseka impi eseUkraine.
Imithombo ebitshelwe ngalolu daba inqabile ukudalulwa ngenxa yobucayi bodaba. UMnyango Wezangaphandle eChina awuzange uphendule ngokushesha esicelweni sokuphawula futhi iKremlin yenqabile ukuphawula.
Enhlabathini, izinhlangothi zombili zachaza ukulwa okungapheli eBakhmut, okuyidolobha elincane empumalanga ye-Ukraine osekugxilwe kuyo kakhulu emkhankasweni wasebusika waseRussia ohilela amakhulu ezinkulungwane zamasosha asanda kubhaliswa kanye nama-mercenaries.
IKyiv imemezele ngesonto eledlule ukuthi inqume ukuvikela iBakhmut kunokuhoxa. Amasosha aseRussia aholwa amasosha azimele enkampani iWagner athumba ingxenye esempumalanga yedolobha kodwa kuze kube manje ahlulekile ukulizungeza.
“Yonke imizamo yesitha yokuthumba idolobha ichithwa yizikhali, amathangi, nezinye iziqhumane,” uColonel General Oleksandr Syrskyi, umkhuzi wamasosha ofunge ukuthi ngeke ahoxe, ucashunwe esho kanjalo yiMedia Military Center yase-Ukraine.
Umsunguli weWagner uYevgeny Prigozhin uthe ngeSonto isimo “sinzima, sinzima kakhulu”. “Lapho sisondela enkabeni yedolobha, kuba nzima nakakhulu ukulwa… Abantu base-Ukrainian bajikijela iziqiwu ezingapheli. Kepha siyathuthuka futhi sizothuthuka,” kusho uPrigozhi .
Uphinde wathi amasosha aseRussia abehlinzeka amasosha akhe ngenqwaba yezinhlamvu. Phambilini uke wakhononda ngokuthi izikhulu zaseRussia bezilambisa ngamabomu amadoda akhe, okuyizinsolo ezichithiwe uMnyango wezokuVikela.
Ukuvakasha kukaXi eRussia kuzoba umcimbi omkhulu kaPutin, oveza impi ese-Ukraine njengokungqubuzana namandla ahlangene aseNtshonalanga. IRussia ithembele eChina ukuthi ithenge uwoyela negesi engeke isakwazi ukuyidayisa eYurophu.
IChina ibingakathathi hlangothi esidlangalaleni ngale mpi, yenqaba ukubeka icala ngayo kepha yakuveza uphikisana nezijeziso zaseNtshonalanga ngokumelene neRussia. Emasontweni edlule ikuvezile ukuthi iyafisa ukuba ngumxazululi walempi, isiphakamiso esihlangane nokungabaza eNtshonalanga.
IMelika ithe kusukela ngenyanga edlule ikholelwa ukuthi iChina icabanga ukuhlomisa iRussia, okuyinto iBeijing ekuphikayo.