Now Reading
UZwane ungaphansi kwengcindezi yokunqoba ukuze abuyise ugazi kubalandeli
Dark Light

UZwane ungaphansi kwengcindezi yokunqoba ukuze abuyise ugazi kubalandeli

Nezimnyama azizwile zifuna ukunqoba nakanjani kusasa ziqhubeke nomgqigqo wazo


Kuphela amaphupho kusasa ngelisi-3 ntambama emdlalweni wabakhaya baseSoweto iKaizer Chiefs ne-Orlando Pirates eFNB Stadium. Intatheli yelaboHlanga uZipho Singela isihlaziyela lendumezulo yomdlalo obhekwe ngabomvu.

Abadlali ababhekiwe:

  UMonnapule Saleng, uKeagan Dolly:

USaleng usefomi embi kulezi zinsuku. Wonke amehlo azobe ethe njo kuyena ekutheni aqhubeke nokugila izimanga. Emidlalweni eli-12 yeligi, uSaleng usebhakuzise enethini amagoli amahlanu wakha amane. Njengamanje usephenduke ithemba leZimnyama phambi kwamapali. Okwenza abeyingozi yijubane, imijiko eya phambili nobuhlakani nokwakhela ozakwabo amagoli noma ukuhlohla enethini. USifiso Hlanti nguyena ozobhekana nejoka lokuvimba uSaleng. Ohlangothini lwaMakhosi kuzobe kubhekwe imilingo kaDolly oyisihlabani seqembu. Kule sizini unamagoli amathathu kanti usakhe amahlanu emidlalweni eli -19. Leli nxele liyazi kahle ingcindezi yokudlala kowabakhaya. Impi iphakathi kwakhe noSaleng.

  UNdabayithethwa Ndlondlo v Yusuf Maart:

Konke okwenzeka emdlalweni kuzoqala enkabeni yenkundla okuyilapho okuzogadulisana khona uNdlondlo noMaart. Ngesikhathi la maqembu edudulana emzulimswaneni wokuqala uMaart nguyena owaphenduka iqhawe.

Washaya ingcwenga yegoli emaphakathi nenkundla. Nalapho ibhola wayekade elintshontshe kuNdlondlo. Nasemdlalweni wakusasa impi yalezi zinsizwa ezimbili izoqhubeka lapho yayigcine khona.

Bobabili bayingozi ngobisi lwamaphasi kanti abagcini ngokuhlakaza iminyakazo yezitha kodwa baphinde kube yibona abaqala iminyakazo emihle uma iqembu lihlasela.

  Saile v Xoki:

Kuzoshunqa uthuli phakathi kukaThapelo Xoki noChristian Saile. Leli nxele leChiefs lifike kwezwakala kuMakhosi. UXoki nguyena ozobe eshade noSaile. Kusukela efikile kuMakhosi usedlale imidlalo emine washaya igoli elilodwa waphinda wakha elinye elilodwa. USaile uzobe edlala okokuqala emdlalweni wabakhaya.

Izibalo:

Unamagoli amaningi: Patrick “Ace” Ntsoelengoe (19)

Isibalo esikhulu iqembu eselake lanqoba ngaso:

Ngowe-1998, eZimnyama zathela Amakhosi ngehlazo lika 5-1.

Iqembu eselike lanqoba imidlalo eminingi ilandelana:

IChiefs isike yanqoba imidlalo emine emlandweni womdlalo wabakhaya.

Osedlale imidlalo eminingi kweyabakhaya:

USiphiwe Tshabalala wadlala imidlalo engama-31.

Abangase baqale umdlalo:

Kaizer Chiefs:

Emapalini: Brandon Peterson

Emuva: Sifiso Hlanti, Siyabonga Ngezana, Zitha Kwenika, no-Edemilson Dove.

Esiswini: Siyethemba Sithembe, Yusuf Maart, Keagan Dolly, Mduduzi Shabalala, no-Ashley Du Preez.

Phambili: Saile

Orlando Pirates:

Emapalini: Sipho Chaine

Emuva: Thapelo Xoki, Innocent Maile, noPaseka Mako.

Esiswini: Bandile Shandu, Deon Hotto, Miguel Tim  noNdabayithethwa Ndlondlo.

Phambili: Saleng, Thembinkosi Lorch noTerrence Dzvukamanja.

Ukubaluleka kwalo mdlalo:

  Ilanga liyamshonela u-Arthur Zwane:

See Also

Uma efuna ukubuyisa ugazi kubalandeli baMakhosi kumele enze isiqiniseko sokuthi iqembu liyanqoba kulo mdlalo.

UZwane usemanyamanambana kubalandeli baMakhosi ngenxa yemiphumela yakamuva yeqembu elibhacazayo. Ngeledlule uphume esegadwe amaphoyisa ngesikhathi iChiefs ibhekene neLamontville Golden Arrows ePeter Mokaba Stadium, ePolokwane. Leli yithuba likaZwane lokubuyisa ugazi kubalandeli.

  IPirates izama ukuthola ithikithiki lokuyodlala kweyeCaf:

Njengamanje eZimnyama zihlezi endaweni yesithathu ku-log yeDSTv Premiership. Uma zinqoba zisethubeni lokujombela endaweni yesibili kulogi.

Amaqembu amabili aqede phezulu ku-log azozibekisela indawo kuCaf Champions League bese kuthi eliqede endaweni yesithathu lizibekisele indawo kuCaf Confederation Cup. Lizojoyinwa elizodla ubhedu kuNedbank Cup.

Bathini abadlali ngaphambi komdlalo?

  Ukaputeni weChiefs u-Itumeleng Khune:

“Ngiyaqonda ukuthi sekunesikhathi ngilokhu ngicela abalandeli ukuthi babekezele kodwa futhi ngicela bazi ukuthi noma kunjalo kodwa nathi sesishintshe abaqeqeshi abahlukene eminyakeni eyedlule. Noma yimuphi umqeqeshi othatha izintambo udinga isikhathi sokuthola uzinzo ukuze alethe imiphumela emihle. Ngiyazi ukuthi iChiefs ayilona yilolu hlobo lweqembu olusebenza ngesikhathi kubaqeqeshi ngenxa yengcindezi yokuba yingxenye yalesi sikhondlakhondla seqembu. KuChiefs asikho isikhathi sokulinda ngoba sinengcindezi yokunqoba zonke izicoco nayo yonke imidlalo esiyidlayo.”

  Umdlali wasesiswini weZimnyama uMakhehleni Makhaula:

“Uvalo lukhona. Lokho angeke ngikufihle. Angikaze ngidlale phambi kwabalandeli abangama-90 000 empilweni yami. Ngikulangazelele ukudlala kowabakhaya. Ngisebenza ngokuzikhandla usuku nosuku ejimini. Konke kuncike kumqeqeshi ekutheni uyangibophela yini. Mina ngisebenza ngokuzinikela. Ngilinde ithuba.”

Imiphumela emihlanu edlule yomdlalo wabakhaya:

  Ngowei-2022 ngoMfufu: Chiefs 1-0 Pirates

  Ngowezi-2022 ngoNdasa: Chiefs 2-1 Pirates

  Ngowezi-2021 ngoLwezi: Chiefs 2-1 Pirates

  Ngowezi-2021 ngoNdasa: Chiefs 1-0 Pirates

  Ngowezi-2021 kuMasingana: Chiefs 1-2 Pirates

Scroll To Top