Now Reading
Inkulumo iyaphambana njengoba iPosi lidiliza nje
Dark Light

Inkulumo iyaphambana njengoba iPosi lidiliza nje

UMengameli ukhuluma ngamathuba emisebenzi ngapha, engxenye abasebenzi bahleli ngokuminca.


Ngesonto eledlule uMengameli uCyril Ramaphosa wethule iNkulumo Engobume Besizwe yaminyaka yonke. Lena inkulumo esuke iqashelwe ngeso lokhozi ngosomabhizinisi, abatshalizimali, izinyunyana, nomphakathi ngokubanzi  ngoba isuke ihlahla indlela ngokuzokwenzeka kuhulumeni.

Ngaphandle kukagesi osuphendule iqaqa esizweni  uRamaphosa nongqongqoshe bakhe ababili, oMnu uGwede Mantashe noPravin Gordhan, inkiyankiya yokungasebenzi kwabantu eNingizimu Afrika ibingeke isale ngaphandle.

Njengoba bekulindelekile uMengameli wenabile ngezinhlelo zokudala amathuba emisebenzi esizweni, entsheni ikakhulukazi. Kepha kukhona ukushayisana nokwenzekayo sikhuluma nje esigabeni sabasebenzi.

Akukhona okokuqala kuqubuka imvunge ngokudiliza ePosini, kepha kuleli sonto kuye kwashuba ngoba iPosi okuyinkampani kahulumeni likuqinisekisile ukuthi nakanjani izembe lizogawula nakhona. sisakhungathwe yilokho, kuphinde kwavela ukuthi uPhiko lwenethwekhi namasela kwaTelkom nalo lusezinhlelweni zokudiliza abasebenzi.

Inyunyana yabasebenzi kulo mkhakha iCommunication Workers Union (CWU) isikushilo ukuthi izogadla ngazo zonke izindlela ukulwa nohlelo lokudiliza. Ikusho ngokungahlonizi ukuthi uma kumele indaba iyoqedelwa enkantolo, ihlome ngokwanele nalapho.

Kungethuse nakancane uma ezinyangeni ezizayo sizozwa ezokudilizwa kwabasebenzi kwezinye izinkampani ezingaphansi kukahulumeni ngenxa yokwehla komnotho. Asiphiki ukuthi kukhona okuhle osekwenzile ekudaleni amathuba emisebenzi, kepha kulokhu uMengameli uwakhethile amagama enkulumweni yakhe ngoba ukwazi kahle okwenzeka ePosini.

Izinkomba zokubheda kwezinto ziqale ngonyaka we-2021 ngesikhathi uhulumeni enciphisa isibalo samaPosi ezweni kehliswa neminye imisebenzi eyenziwa khona. Akusewona wonke amaposi ezweni okwazi ukuthelela kuwo imoto, okwadalwa yikho ukuvalwa kwawo.

See Also

Nokho kokuningi enkulumweni yakhe uMengameli ibhola uliphase kuNgqongqoshe Wezimali uMnu u-Enock Godongwane athe nguye ozocacisa ngokuningi esabelweni sezimali azosethula ngesonto elizayo.

Lapha uGodongwane kulindeleke ukuba achaze ngokuthi iPosi lizotakulwa kanjani kulolu bishi nenjoba kuhlale kwenzeka kwaSouth African Airways (SAA) nakwaDenel.

Inselelo ye-ANC nehola uhulumeni ukukhuluma iziphikisa okuyinto elingayilimaza okhethweni.

Scroll To Top