Ungoti ubona okwehlukile ngesivumelwano sikaSA Tourism neSpurs
Lususe omkhulu umsindo udaba olugcine luphenduka undaba mlonyeni phakathi phakathi kweSA Tourism neqembu lebhola laphesheya kwezilwandle iTottenham Hotspur egijima ku-English Premier League (EPL) kwelamaNgisi.
Kuvela ukuthi iSA Tourism ibizimisele ukuchitha imali elinganiselwa kwisigidigidi (R1 billion) ukuxhasa iqembu laseLondon, iSpurs yodumo lokukhiqiza ukhilimu wabadlali okubalwa kubona izinsephe ezifana noLuka Modric waseCrotia, uGareth Bale waseWales noHarry Kane ongukaputeni wamaNgisi.
Lolu xhaso bekubhekwe ukuthi lenzele iSA Tourism inzuzo elinganiselwa kwizigidi ezingama-R45.
Intatheli yelaboHlanga, uZipho Singela (ZS) ihlale phansi nongoti uma kuziwa ngakwezamabhizinisi kwezemidlalo, uSgwili Gumede (SG) ogeqa amagula ngalolu daba olunyakazise i-Afrika yonkana.
Zipho Singela (ZS): Ngeviki eledlule indaba ethinta umnyango wezokungcebeleka nokuvakasha neTottenham isuse udungunyane. Ake silubheke lolu daba. Ngabe umbono womnyango wezokungcebeleka ubuwenza umqondo ophusile uma kubhekwa ngakwezomnotho noma kwezezimali?
Sgwili Gumede: Yebo, lo mbono ubuwenza umqondo. Ezemidlalo nebhola kuhamba mdibimunye nezokungcebeleka kanjalo nezokukhangisa. Yize isikhathi esiningi ezokungcebeleka nokukhangisa zisebenza nezinye izinkampani zokungcebeleka kodwa isikhathi esiningi zisebenzisa isu elithi alicishe lifane naleli ebelihlongozwa umnyango wezokungcebeleka nokuvakasha kuleli.
Amazwe amaningi aze asebenzise izindiza zasemazweni awo ukukhangisa noma ukuheha izivakashi. Uma ngenza umzekelo nje i-UAE (United Arab Emirates) isebenzisa indiza eyaziwa nge-Emirates ne-Etihad ukufeza izinjongo ezifanayo nebezifiswa ukuzuzwa ngumnyango wezokungcebeleka lapha ekhaya. Amanye amazwe afana neQatar, Turkey, UK, Australia, Russia namanye amazwe asebenzisa iqhinga elifanayo ukuheha izivakashi ukuze enze inzuzo ecacile ngezokuvakasha.
La mazwe engiwabalayo asebenzisa izindodla ukukhangisa ezinkampanini ezifana neBBC, SKY neCNN. ISA Tourism ibihlose ukusebenzisa iPremier League ukwenza inzuzo. Phela le ligi ithanyelwa yizinkumbi zabalandeli emazweni ahlukene emhlabeni jikelele futhi ihamba phambili ngezibukeli kunobhutshuzwayo.
ZS: IRwanda inobudlelwano obufanayo neqembu lebhola i-Arsenal egijima ku-EPL. Ngabe lihlomula kanjani lelizwe lalapha Afrika ngokukhangisa emfaniswaneni yeGunners?
SG: Yebo, izivumelwano zala mazwe womabili iNingizimu Afrika ebihlela ukusebenzisana neSpurs kanjalo neRwanda enobudlelwano obusemthethweni ne-Arsenal ziyefana indlela ezididiyelwe ngakhona ngokohlelo nangokwamalungelo. Okwesibili la mazwe amabili abenezinhloso ezahlukene kodwa abefuna ukusebenzisa iqhinga elifanayo. Okwesithathu womabili abezokwazi ukuzuza izimfuno noma izinjongo zawo esebenzisa amaqembu kanobhutshuzwayo.
ZS: Bekubhekwe ukuthi iNingizimu Afrika yenze inzuzo ngalolu xhaso. Kungani pho lolu daba luhlukanise phakathi izwe ngokuhlaziya kwakho?
SG: Yingoba abantu abaputshuze udaba bebelingabaza leli qhinga noma igxathu ebelihlelwa ukuthathwa iSA Tourism. Okwesibili bayithathe yonke lento ngepolilitiki okwenze kwalahla wonke umqondo weqhinga. Angikholwa wukuthi kunenqwaba yabantu abasalele emuva kulolu daba. Vele bekuzobayinkinga uma kunabantu abafafaza indaba yokusetshenziswa kwesigidi samaRand bese ingaqhakanjiswa indaba yokuthi ubuzohambisana nenzuzo elinganiselwa kwizigidi ezingama-45 ebizotholakala kulo mkhakha. Eqinisweni lilonke asinaso isiqiniseko sokuthi iningi lezakhamizi zakuleli ziyakhala. Phela lenkundla yokuxhumana eyaziwa ngo-twitter iyingozi embi.
ZS: Yibuphi ububi nobuhle balokhu?
SG: Ukube isivumelwano phakathi kukaSA Tourism neSpurs siphumelele elakuleli belizothola ingqayizivele yethuba lokuthumela umyazelo walo wokukhangisa ngezokuvakasha ezinkumbini zabalandeli bebhola ababuka i-EPL emazweni ahlukene. Ububi besivumelwano ukuba siphasile wukuthi akuzona zonke izivakashi ezilandela ibhola, ezemidlalo noma iPremier League. Lezo zivakashi bezizophuthelwa kulesi sivumelwano.
ZS: Ngabe umnyango wenze okwanele ukuchazela iNingizimu Afrika ngaleli qhinga lokuxhasa iqembu laphesheya nobuhle bakhona ngokwenzuzo?
SG: Ngizothi yebo ngiphinde ngithi cha. Ukube abakwaSA Tourism baqale bethula umkhankaso ngaleli qhinga izakhamizi bezizoluqonda kanconywana lolu daba. Ukuputshuka kodaba kumoshe kakhulu izinto. Ngokwami abazange baqhamuke nezindlela ezinobuhlakani zokusingatha lolu daba ngendlela efanele. Abantu obekumele balalele baphinde badingide udaba abasitholanga isikhathi esanele sokubhekana nodaba.
