UNgema ufunga uyagomela ngomdlalo wezakhe neCasric Stars
Unozinti ophinde abe ngukaputeni weqembu eligijima ku-ABC Motsepe League esifundazweni iKwaZulu-Natal elibizwa ngoMkhambathi FC, uSifiso Ngema (osesithombeni) uthi baya emdlalweni weNedbank Cup ngokukhulu ukuzithemba.
UMkhambathi FC uzodlala neCasric Stars egijima kuMotsepe Foundation Championship. Lo mdlalo uzokuba ngeSonto libumbele elesi-3 eHarry Gwala Stadium.
“Okwenza siye kulo mdlalo sinokukhulu ukuzithemba ukuthi sizobe sidlala neqembu elingasazi nhlobo thina esilaziyo, sibabonile bedlala noThongathi FC koweligi siyazi ukuthi sizobe sibhekene nabantu abanjani. Thina sizobamangaza ngoba bazosithatha njengeqembu nje elidlala esigabeni esiphansi, abangalazi nhlobo. Ngingasho ngithi sifihle induku emqubeni” kusho uNgema.
“Okunye okuzokwenza sizithembe ukuthi sizobe sidlala ekhaya. Lena inkundla esazitshela ukuthi akuphumi muntu kuyona, nangeSonto sizobe siqhubeka kumgomo wethu esazibekela wona wokungaphumi lutho esibayeni sethu. Abalandeli bethu bazoba umdlalo we-12 ngoba nakanjani bazoyigcwalisa inkundla, sizobabonga ngokuthi sibanqobele lomdlalo sidlulele kumzuliswano olandelayo weLast 16,” usho kanje.
Uphinde wabalula ukuthi ukunqoba kwabo ngeledlule kubasize kakhulu nakho. UMkhambathi FC uhlule iGreenWood Park (GWP) Friends ngamagoli amathathu kwelilodwa koweligi, lowo mdlalo ubusho lukhulu ngoba bebedlala neqembu abasembangweni weligi nalo.
Njengoba ukuLast 32 weNedbank Cup uMkhambathi nakuligi wenza kahle ubalwa namaqembu asembangweni wokunqoba eqoqweni B. Usendaweni yesithathu ngamaphuzu angama-21 usele ngamaphuzu amathathu kuMsinga United, kanti unomdlalo osele.
“Isifiso sethu ukuthi siye emdlalweni yokuhlunga singene kwiMotsepe Foundation Championship, kodwa ngeke sakuthatha kancane ukuthi sikwiNedbank Cup esibheke ukwenza kahle kuyona. Isikwati esinaso sanele ukuthi singadlala kwiligi nakwiNedbank Cup. Sizodlala ngokukhulu ukuzimisela asikhathali ukuthi sifika kusiphi isigaba kulo mqhudelwano,” usho kanje uNgema odume ngelikaPolony.
Leli qembu laseMkhambathini eliphethwe uGoodluck Mzobe isizini yesibili likhona kwi-ABC Motsepe League, lifike ngesizini edlule nakhona maphakathi nayo lithenge isitifiketi sokudlala kulesi sigaba kwi-G Millionaire okuyiqembu laseMzimkhulu. Liqeqeshwa umqeqeshi onamava uSiya Mdluli oseke wayibamba eqenjini elidlala kwi-DStv Diski Challenge (DDC) njengomqeqeshi.
UNgema oneminyaka yobudala engama-30 usevimbe isikhathi eside ku-ABC Motsepe League, uvimbe kuMaritzburg City, iHappy Wanderers, iG Millionaire neKwaDabeka Sporting.
Ubalule ukuthi luhle kakhulu ubumbano olukhona eqenjini kusukela kwizikhulu kuzofika kubadlali. Wabonga indlela umphathi weqembu abaphethe ngayo, nokwenza bekhohlwe ukuthi badlala esigabeni esiphansi.
