Owase-Afrika ufisela i-Afrika inqobe ngoMane
Uthi wayengakaze azibone edlalela amaqembu ebhola amakhulu emhlabeni phezu kwalokho wakwazi ukunqoba izicoco futhi wadlala nakweyomhlaba
Ifuna ukubona isibabuli somgadli weSenegal neLiverpool, uSadio Mane ekhala emuka nomklomelo womdlali ovelele emhlabeni ingwazi yomdlali waseGhana uHans Adu Sarpie.
Le ngwazi edlale iminyaka eli-14 eGermany emaqenjini afana noWolfsburg, iBayer Leverkusen noSchalke 04 ihlale phansi yaxoxa nentatheli yelaboHlanga uZipho Singela.
Ingxoco yabo ibiseGoli nale ngwazi evakashele iTS Galaxy Football Club ihambe kanje.
Zipho Singela (ZS): Hans, siyajabula ukuba nawe kwelaboHlanga, awusixoxele ngohambo lwakho lapha eMzansi.
Hans Adu Sarpie (HAS): Ngijabule ukuba lapha eNingizimu Afrika. Umqeqeshi weTS Galaxy uSead Ramovic ngidlale naye eGermany kuWolfsburg. Sadlala ndawonye ngowezi-2001 kuya kowezi-2003 kodwa asikaze siyeke ukuxhumana. Ngilapha ukuzoncela ulwazi kuSead. Ngifuna ukubona indlela izinto ezenziwa ngakhona lapha eNingizimu Afrika. Ngemuva kokuyeka ibhola nami ngikhethe ukungena emkhakheni wokuqeqesha. Njengamanje ngiphethe i-Uefa A Licence. Ngilungiselela ukwenza i-Uefa Pro Licence.
ZS: Udlale phesheya kwezilwandle iminyaka eli-14. Kube yini ukhiye wakho wempumelelo?
HAS: Ngikhulele khona eGermany. Namanje ngisahlala khona. Ngesikhathi ngisadlala ngake ngabhekana nesinqumo esinzima. Kwakumele ngikhethe ukuthi ngizodlalela liphi izwe phakathi kweGermany neGhana kodwa ngaqoka iGhana ngoba kulapho engizalwa khona. Isikhathi sami neqembu lesizwe laseGhana saba sihle kakhulu ngoba ngidlale amahlandla amabili kweyeNdebe YoMhlaba. Ngowezi-2006 eGermany saphuma ku-Last 16 sikhishwa yiBrazil eyayivikela isicoco kwathi ngowezi-2010 saphuma kumaQuarterfinal sikhishwa yi-Uruguay.
ZS: Awusichazele ngobuhlungu bokuphuma kuma-Quarterfinal ngeNdebe YoMhlaba yowezi-2010 eNingizimu Afrika.
HAS: Ngowezi-2010 kwakusifanele ukwedlulela kowandulela amanqamu. Nokho kunomdlali oyedwa owama endleleni yethu okunguSuarez (Luis). Namanje leso silonda sisabhibha. Lesi yisilonda esingapholi. Phela umhlaba wonke wawuhamba nathi.
ZS: Ngokubona kwakho ngabe uyalibona iqembu lesizwe lase-Afrika linqoba iNdebe YoMhlaba eminyakeni ezayo?
HAS: Empilweni kumqoka ukuthi ungazenyezi. Ngaso sonke isikhathi kumele uhlale uzethemba. Kumele kuqale kithina ukukholwa ukuthi singayinqoba iNdebe YoMhlaba. Empilweni ayikho into engenzeki. Njengezakhamizi zase-Afrika asiwasekeni amaqembu akithi. Akukho lula kodwa ngelinye ilanga kuyokwenzeka. Phela amazwe ase-Europe abophele amazwe ali-14 kanti thina e-Afrika sinamazwe amahlanu asuke esimele. Ngakho akulula kodwa ngelinye ilanga kuyokwenzeka. Kulo nyaka angeke ngithuke uma singabona elinye la mazwe ase-Afrika efinyelela kowandulela amanqamu.
ZS: Yimiphi eminye imizuzu ongasoze wayikhohlwa empilweni yakho yebhola?
HAS: Ukudlalela amaqembu amakhulu njengeWolfsburg neSchalke 04. Ngangingakaze ngizibone ngidlalela la maqembu amakhulu kangaka eGermany. Phezu kwalokho ngaphinde nganqoba iGerman Cup neSchalke 04 ngowezi-2010/11. Ukudlala iNdebe YoMhlaba neGhana eGermany lapho ngakhulela khona kwaba yinto enkulu kakhulu kimina kwathi ngowezi-2010 ngadlala iNdebe YoMhlaba yokuqala e-Afrika. Angiboni ukuthi iyoke iphinde yenzeke into efana nale.
ZS: Ubani ocabanga ukuthi usethubeni elihle lokunqoba umklomelo weBallon d’or phakathi kukaKarim Benzema noSadio Mane? UMane unqobe i-Afcon, iCarabao Cup kanti ukowamanqamu eFA Cup ne-Uefa Champions League. Ngakolunye uhlangothi uBenzema usenqoba isicoco seLa Liga kanti ukowamanqamu weChampions League. Uwunika bani lo mklomelo?
HAS: Ungifaka ekhoneni manje ngalo mbuzo. Bobabili la badlali bagila izimanga emaqenjini abo nawesizwe. Bazobhekana bobabili kowamanqamu eChampions League. Ozophumelela owamanqamu eChampions League usethubeni elihle lokunqoba lo mklomelo. Ngihlalele ethembeni lokuthi uMane kube nguyena ozothatha lo mklomelo. Eminyakeni eyedlule i-Afrika ikhiqize inqwaba yabadlali kodwa usayedwa owine lo mklomelo. Uma uMane enganqoba lo mklomelo kuyobe i-Afrika yonke inqobile. Ngimfisela konke okuhle.
ZS: Yini eyenza iBundseliga ibe nzima kangaka?
HAS: IBundesliga ayilula. Inzima kakhulu. Okuyenza ibe nzima wukuthi idinga wukuthi ube namaqhinga, uqine ngokomqondo nangokomzimba bese uba nekhono eliyisiphesheli. Uma udlala eSpain udinga ikhono eliyisiphesheli, kwelamaNtaliyane udinga ukuthi uqine ngokomzimba nangokomqondo kanti kwelamaNgisi kusebenza kakhulu amaqhinga. KwelamaJalimane uzidinga zonke lezi zinto.
ZS: IBayern Munich iyazenzela kwelamaJalimane. Yini eyenza icanase kanje?
HAS: Wonke umuntu ungibuza lo mbuzo ngoba sebenqobe isicoco seligi amahlandla ayishumi elandelana. Babophele abadlali abahamba phambili emhlabeni. Banomqeqeshi ohamba phambili kwelamaJalimane kanti banayo yonke imali yokuthenga abadlali ebafunayo. Yonke into yabo iseqophelweni eliphezulu. Okwenza bahluke wukuthi bafuna ukunqoba yonke imidlalo abayidlalayo.
ZS: Ngabe mangakanani amathuba okuthi iDortmund neLeipzing baqede ukucanasa kweBayern?
HAS: IBorrusia Dortmund neRB Leipzig amaqembu amabili analo ithuba lokufaka umbango kuBayern. Amaqembu athuthukayo. Nami ngifuna ukuwabona eshubisa umbango. Phela sekuyacoba ukubona iBayern izenzela.
ZS: Abaqeqeshi baseGermany abafana noJurgen Klopp noThomas Tuchel bakhula ngesivinini. Yini le eyenziwa ngusoseshini waseGermany eyehlukile?
HAS: Abaqeqeshi baseGermany bayathuthuka. Lokhu kusidweba sicace ukuthi usoseshini waseGermany owugcini nje ngokuthuthukisa abadlali kodwa nabaqeqeshi. Uma kuthuthuka abaqeqeshi nabadlali bayathuthuka bese nebhola lidlondlobale.
ZS: Siyabonga ngesikhathi sakho.
HAS: Kubonga mina.