Phezu kokuzimela i-Afrika isalibhande mnqakiswano, kusagilwa kuyo imikhuba
Ukwehla kwefulegi labacindezeli kuphakame elezwe elisha elikhululekile iGhana nokwaba ngokokuqala e-Afrika kwaletha ithemba nogqozi kwabaningi ekutheni izinto zizoguquka. Okwaqala eGhana ngaphansi kuka Kwame Nkrumah kwaqhubeka nakwamanye amazwe ase-Afrika kwaze kuba izwe lokugcina liyakhululeka. Namuhla nje onke amazwe ase-Afrika anamafulegi awo naluphawu lokuzimela nenkululeko. Nokho umbuzo uthi ngabe leli zwekazi elinabantu abangaphezu kwesigidi likhululekile yini? Impendula elula ithi yebo ngoba asebephethe ngaboHlanga kuwo onke amazwe lawa kepha ejulile ithi yize abase-Afrika bephethe kepha nabo baphethwe ndawo ndawo.
Akuyona imfihlo ukuthi izwekazi i-Afrika selokhu kwathi nhlo seyaphenduka umnqakiswane wamazwe asentshonalanga, kanti muva nje nawase-Asia nawo aseyakopela, kuyaqhubeka ukugilwa kwemikhuba. Lokhu kungenxa yezizathu ezahlukene nezithinta ipolitiki yezomnotho. Phakathi kwemikhuba ebigilwa nesaqhubeka igilwa ngeyokufumbathisa abathile ukuze kube nokuketulwa kohulumeni nemibuso. Kuthatha izimbiwa ziyiswe ngaphandle kwezwekazi, namazwe ase-Afrika afakwe ezikweletini ukuze aphenduke ‘amafa’ asentshonalanga. Kuyimanje acebile amazwe asentshonalanga ngenxa yomnotho wezwekazi. Phakathi kwamazwe abengobhongoza kulokhu yi Britain, iFrance neGermany. I-USA yona yize kungekhonjwe lutho.
Kusanda kuphuma iFrance nje kwamanye amazwe sekungene iChina neRussia nayo yize kungenakeke yenza okufanayo ukuthatha okuthile e-Afrika. Enhlokodolobha nje i-Addis Abbaba ezweni i-Ethopia izakhiwo ze-African Union zakhiwe futhi zibhekwe yiChina. Kumazwe ayephethwe ngabase France iRussia isingene yaxova izihonga kwaketulwa uhulumeni eMali. Kuyimanje iRussia imandla eCentral African Republic (CAR), eSudan, eLibya, eDemocratic Republic of the Congo nakhona eMali.
Ngakolunye uhlangothi iChina nayo kayizibekile phansi. Izinkampani , utshalomali, imalimboleko nemiklamo yengqalasizinda yamaShayina igubuzele izingxenye eziningi ze-Afrika. Okunye ongoti asebekubhekile wukusebenzisana kwezempi phakathi kwamazwe ehlukene e-Afrika neChina.
Kwenzeka nje konke lokhu akhona amazwe nabaholi abazama ukuphuma kulonoxhaka. UMengameli waseGhana uNana Akufo-Addo kakufihli ukuthi isikhathi sokuba i-Afrika ingatholi usizo ngokukhangeza sesifikile. ERwanda uMengameli uKagame uyapaquza kunzima. UMengameli waseNingizimu Afrika uRamaphosa ukhuluma ekhulumile ngesidingo sokuzimela kepha izinto kazihlangani. Ukungabambisani nokungasebenzisani kwamazwe kubukeka kuyikho okuyinkinga. Isibonelo ngesikhathi kuhlasele ukhuvethe iNingizimu Afrika yakhe inkampani ekhiqiza imishanguzo, kepha lenkampani kuthiwa ayikaze ithole ngisho isicelo esisodwa kusuka kuwo amazwe ase-Afrika. Onke athenga entshonalanga, eChina noma eRussia. Lesi sithombe siveza ubunzima bokuphuma emakhamandeleni kumazwe ase -Afrika.
