Bazozitika ngesibhakela esiqhwiza umentshisi
Emasontweni amathathu ezayo abathandi besibhakela KwaZulu-Natal bazozitika ngesibhakela esizobe sihlabahlosile.
NgoMgqibelo ozayo kuzokuba nezimbi ezihlelwe iHle Jobe Boxing Promotions, lezi zimpi zizokuba seCity College Hall, eDundee impi eyobe ibhekiwe ekaGcina Makhoba oyobe ekhiphana inkani noRoberto “Ingqo” Paradero wasePhilippines kweyeWBF Bantamweight.
Kuyothi ngakusasa ngeSonto kube izimpi zeLudonga Boxing Promotions kaZwilenkosi Magudulela oyindodana kamufi uThulani “Nkunzi” Magudulela. Ngokomthetho lezi zimpi bekumele zibe kusasa ngoMgqibelo kodwa zahlehliselwa iSonto elizayo.
Izimpi ezizobe zibhekiwe eka-Ayanda Mthembu noSinamiso Ntuli belwa kweye-WBF All Africa Middleweight, kube ekaSabelo Cebekhulu noMawande Matross kweyeWBF All Africa Bantamweight.
Ngomhla zili-11 kuZibandlela koba nezimpi zeJoy 4 Joy Promotions, okuzobe kuhlonishwa kuzo iSILO uMisuzulu kaZwelithini kobizwa ngeKing Misuzulu International Tournament lo mqhudelwano uzoba seMoses Mabhida Stadium eThekwini.
Kwezinye izimpi ezizobe zikhona ekaRoland Malindi noJorge Orozco Mendoza waseMexico kweyeWBF Bantamweight, eka-Azinga Fuzile noRene Tellez Giron waseMexico bebanga ibhande le-IBO International Lightweight, uRofhiwa Nemushungwa noFillipus Shanuka kweyeWBA Pan African Bantamweight.
Ezizovala unyaka eziqhathwe iStarline Boxing Promotion kaZandile Malinga. UKaMalinga uthe konke kuzoqinisekiswa namhlanje ngoLwesihlanu ngalezi zimpi.
ElaboHlanga likhulume noMike Dube oyimenenja yesibhakela esifundazweni iKwaZulu-Natal, nowaqokwa ngonyaka wezi-2020 engena esikhindleni sikaFrancis Manning osewadlula emhlabeni. UDube uthe kuyajabulisa ukuthi kuzoba nezimpi ezingaka emasontweni azayo. “Isimo sithanda ukuthi sibe ngcono kuyajabulisa kakhulu ukuthi sibe nezimpi ezingaka. Kule minyaka emibili edlule ziningi izimpi ezibhuntshile, nezinga lesibhakela lehla. Kulo nyala kuqopheke umlando ukuthi kunyuswe osomankomane abangama-50 abasuka esibhakeleni sama-Amesha beze esibhakeleni esikhokhelwayo, lokho kwagcina eminyakeni eli-15 edlule.
