Ukushiywa nguyise esemncane kwamenza waqina kunakuqala
Ukushiywa nguyise emhlabeni eneminyaka emine vo kwamqinisa empilweni uNelisa Mchunu okumanje umphakathi waseWartburg neKwaZulu-Natal yonke iyazigqaja ngaye.
Kubalandeli bakhe kwezokulingisa kuthelevishini waziwa ngoFikile okusukela endaweni ayilingisayo emdlalweni Uzalo.
Wazalwa zimbili kuNhlolanja we-1992 emndenini omkhulu. Emuva kokudlula kukayise, umsebenzi wokubakhulisa benodadewabo nabafowabo wawela ezandleni zikanina okwabe kungeyona into elula ngaleso sikhathi.
Ekukhuleni kwakhe wayevele ekuphokophelele ukuvelela. Ekuphothuleni kwakhe umatikuletsheni wabhalisela ukwenza izifundo zeMedia Studies eNyuvesi iWitwatersrand. Kwaphoqeleka ukuba ashiye phakathi ngenxa yokwentula izimali, unina ehluleka ukumelana nezindleko zenyuvesi.
Lokho akuzange kumthene amandla ekuphumeleliseni iphupho lakhe lokulingisa. Ukulingisa kuZalo kulandela, ukubonakala kweminye imidlalo edumile kuthelevishini njenge-ISidingo, Isifiso, Ses’Top La, noGenerations: The Legacy.
Ukudlala indawo kaFikile yikho kanje okufike kwambeka kakhulu emehlweni abantu. Ngesikhathi enengxoxo esiteshini sethelevishini iThe Afternoon Express, waveza ukuthi akaphangi mdlaka semngathi linile uma kuziwa ngasekubhekeni umuntu ongase abe ngumaqondana wakhe.
Waqhuba wathi uma kwenzeka kuqhamuka umaqondana uyomnika ithuba kubonakale ukuthi lokho kubabekaphi.
Indlela afike walingisa ngayo indawo kaFikile ku-Uzalo lapho ayethandana khona noSbu ogama lakhe langempela okungu Simphiwe Majozi kwenza ababukeli bagcina sebenokudideka ngokuthi laba bayizithandani zangempela.
Ngesikhathi eshiya kuZalo ababukeli baba nokukhathazeka baze babhala nasezinkundleni zokuxhumana ngobuhlungu ababuzwa.