Abezokushushisa bathi bathembele ebufakazini beKhomishini
AboPhiko Lwezokushushisa iNational Prosecuting Authority bathi bathembele kubufakazi beKhomishini engokuGwamandwa Kwamandla oMbuso ukuze baqinise icala elibhekene nababeyizikhulu eziphezulu kwaTransnet nezinye izikhulu zezinkampani ezixhumene nomndeni wakwaGupta. Lokhu kuqinisekiswe okhulumela lolu phiko uSindisiwe Seboka.
Ngasekuqaleni kwesonto kuboshwe owayeyisikhulu sakwaTransnet uMnu uBrian Molefe nowayeyisikhulu esiphezulu kwezezimali uMnu u-Anoj Singh. Lesi senzo sasihlobene necala lokukhwabanisa nenkohlakalo ekuthengweni kwezitimela ezingaphezu kwenkulungwane okwaholela ekutheni inkampani exhumene nabakwaGupta, iTrillian Capital, ithole imali eyizigidi ezingama-R93 000 yokubonisana ngowezi-2015.
USingh noMolefe bavele eNkantolo Yamacala ethinta iMali ePalm Ridge badedelwa ngebheyili elinganiselwa ezi-R50 000 umuntu ngamunye. Baphinde bavele enkantolo ngoNcwaba zili-14.
UMmeli kaMolefe uthe akakwazi ukukhokha imali eyizi-R50 000, angakwazi ukukhokha eyizi-R20 000 kuphela ngoba akasasebenzi okwenza angabi nayo imali engenayo kuyena zinyanga zonke.
USeboka echaza ngokubaluleka kobufakazi abanabo uthe, “Njengoba kwaziwa ukuthi kwiKhomishini ephenya ngokugwamandwa kwamandla ombuso kunezinsolo ezahlukene ezavela nezakhulunywa, ikakhulukazi ngezinkampanini eziphethwe nguHulumeni, uTransnet kanye no-Eskom, ukuthi kwenzekani. Kuyaziwa ukuthi ubufakazi bukaMnu uFrancis Callard bubaluleke kakhulu kulolu daba. Nokho, njengoPhiko Oluphenyayo, siphinde sasebenza ngophenyo lwethu, sazitholela ezethu izinto zophenyo ngaphambi kokuba lolu daba lubhaliswe enkantolo. Kodwa-ke, sazihlonipha izincomo zeKhomishini,” kwengeza uSeboka.
IKhomishini ephenya ngokugwamandwa kwamandla ombuso ithole ukuthi izelamani zakwaGupta zathola imali elinganiselwa kwizigidigidi eziyisi-R6.
Impahla eshaqiwe
Ngasekuqaleni kwale nyanga, uTransnet uthe ukwazile ukushaqa impahla yentengo elinganiselwa ezigidini ezingama-R26 okwakungeyabasebenzi balenkampani abangasekho abathinteka enkohlakalweni.
Le nkampani ithe iningi lalaba basebenzi besulile noma baxoshwa. Le nkampani yezitimela ibichazela iPhalamende ngenqubekelaphambili eseyenziwe mayelana nophenyo lwangaphakathi lokungaziphathi kahle kwabasebenzi bakwaTransnet.
INhloko yoPhiko lweLegal Service, uSandra Coetzee, uthe lonke uphenyo olwenziwa kanye noPhiko Olukhethekile Lophenyo seluphothuliwe.
“Impahla ekhona ukuze kwenziwe imali ibalelwa ezigidini ezingama-R26. Inqubo yokwenza imali ngalezo zimpahla ihlobene nokushatshalaliswa, kungaba ukuthi kuyindlela yokuthi kudayiswe esidlangalaleni noma olunye uhlobo lokuthengisa ukuze kubuyiselwe imali. Sesiyitholile imali engaphezulu kwezigidi ezili-R14 esikweletini sezigidi ezingama-R26 yenani lempahla. Lolu wuhlelo oluqhubekayo ngokubambisana Nophiko Olukhethekile Lwabaphenyi,” kusho uCoetzee.