Kubonakala ngathi uyaziphungela ekwahlulekeni uBroos – Radebe
Ugxeka umqeqeshi weBafana Bafana uHugo Broos (osesithombeni) ngenkulumo yakhe ayenze esidlangalaleni ekhwela edilika kubadlali bakhe ebasola ngokungabi ezingeni lomhlaba owayengukaputeni weqembu lesizwe uLucas “Rhoo” Radebe.
UBroos usezakhele isigcwagcwa kubalandeli nabaqeqeshi bamaqembu eDStv Premiership ngobukeka iqiniso njengoba linjalo.
URadebe owayengukaputeni weBafana utshele elaboHlanga ukuthi akahambisani ngendlela uBroos aziphethe ngayo.
“UBroos uyangiphoxa ngendlela enza ngayo. Lezi zinto azibalayo yizinto okwakumele enze ngazo ucwaningo ngaphambi kokuthi athathe umsebenzi. Wathatha umsebenzi wokulolonga iBafana azi kahle ukuthi asinalo iningi labadlali abagijima kumaligi amakhulu emhlabeni. Indlela asenza ngayo ngathi ubeka izaba ngemuva kokudliwa,” kubeka uRadebe.
UBroos uthathe izintambo zokucija iBafana Bafana ngonyaka odlule kuMolefi Ntseki. Umsebenzi wakhe wokuqala bekuwumqansa wukufaka iBafana kweyeNdebe YoMhlaba eQatar ekupheleni konyaka.
Lo mqeqeshi odabuka eBelgium uhlulekile wukufaka iBafana kweyoMhlaba. Ngemuva kwalokho uxetshulwe yiFrance ngo 5-0 kowesihle.
“Awukwazi ukukhuluma ngabadlali bakho budedengu esidlangalaleni. UBroos ushaye isikhala. ISouth Africa Football Association kumele ihlale naye phansi imkhuze ngesenzo sakhe. Yena uqinisile ngezinye zezinto akhuluma ngazo kodwa simqashele kona ukuthi azilungise hhayi ukuthi agiye ngazo. Ukhulumisa okomuntu ohlulekayo,” kuqhuba uRadebe.
IBafana iqunjwe phansi yiMorocco emdlalweni wokuqala kweyokuhlungela ukuzibekisela indawo kweye-Africa Cup of Nations (Afcon) ngonyaka ozayo e-Ivory Coast.
Elakuleli selizobhekana neLiberia ekhaya nasekuhambeni ngoMandulo.
“Abadlali akumele bayifake enhliziyweni inkulumo kaBroos. Izinto ezifuze lezi ziyenzeka emdlalweni webhola. Okwakho njengomdlali wukuzidlulisa ugxile ekutheni uma usuthola ithuba wenze kangcono,” kusho uRadebe.
UBroos ukhala ngokugqoza kwabadlali bakuleli abagijima emazweni aphesheya.
“Yebo, ngeke sikubalekele ukuthi lehlile izinga asihambisa ngalo abadlali emaligini amakhulu emhlabeni. Ngesikhathi sifika ebholeni lomhlaba silinyusile kakhulu izinga. Kodwa lokho akusho ukuthi kufanele silahle ithemba,” kubeka uRadebe.
IBafana sekuphele iminyaka yagcina ukudlala kweyeNdebe YoMhlaba. Yagcina ukuba yingxenye yomdlalo ngowezi-2010 ngesikhathi ingosokhaya.
Ukungena ngezithukuthuku zayo yagcina ngowezi-2002 eJapan/Korea. Kulo nyaka kuphela iminyaka engama-20 iBafana ihluleka wukuzibisekela indawo kweyoMhlaba.
Ibingabonwa nangokhalo kwelamaJalimane ngowezi-2006. Iphinde yayizwa ngendaba ngowezi-2014 Brazil naseRussia ngowezi-2018.
“ Izwe nezwe liba nesikhathi lapho lisuke lishisa khona. Ekuhambeni kwesikhathi liyahlaselwa yisimo lapho liphikwa khona izinto. Nathi ziyasiphika njengamanje. Okwethu wukubheka ukuthi yini le esingayenzi ngendlela bese sizama ukuyilungisa ukuze sibuyele ezingeni lethu,” kubeka uRadebe.
Ngesikhathi esadlala uRadebe wayibamba kweyoMhlaba ngowe-1998 eFrance nangowe-2002. Le ngwazi yaphinde yakhala yemuka nesicoco se-Afcon ngowe-1996.
“Kumqoka ukuthi sibe nabadlali bakuleli abadlala emazingeni aphezulu phesheya kwezilwandle. Lokhu kwenza bangathuki uma sebebhekene nezihlabani zamazwe omhlaba ngoba babhekana nazo isonto nesonto. Yingakho nathi kwakubalula ukuthi singene kule miqhudelwano emikhulu. Sasinenqwaba yabadlali ababedlala kumaligi amakhulu emhlabeni. Lokho kwakulisiza iqembu lesizwe. Ababedlala kuleli babenza kahle emiqhudelwaneni yeCaf. IPirates yanqoba iCaf Champions League ngo-1995 kwathi iBafana yanqoba i-Afcon ngonyaka olandelayo.” kuphetha uRadebe.