Usakhala ngokunqamuka kokukhuliswa kwamabhobhodleyana ebholeni
Owayengumqeqeshi wenkulisa yasesifundazweni iKwaZulu-Natal iKZN Academy uSmart Ndlovu unesifiso sokuthi kubuyiswe umqhudelwano owaziwa ngeDurban Under-19 International Tournament.
Lo mqhudelwano ungeminye emikhulu eseke yaba khona kuleli njengoba wawufaka namaqembu aphesheya kwezilwandle. Ukugcina ukuba khona kwawo kwabangunyaka wezi-2016, ekubeni wawuqale ngowezi-2014.
Amaqembu ayeba yingxenye yalo mqhudelwano i-Arsenal yase-England, iTP Mazembe yaseDRC Congo, iRangers yaseScotland, i-AS Roma yase-Italy, iPSV Eindhoven yaseNerthelands kube iSporting Libson neBenfica okungamaqembu asePortugal.
Lo mqhudelwano wawuhlelwa iyona iKZN Academy kusezetshenziswa izinkundla okubalwa iPrincess Magogo Stadium, iKing Zwelithini Stadium neMoses Mabhida Stadium.
“Kuze kube imanje kubuhlungu ukuthi wavele waphela kalula nje lo mqhudelwano. Ukube kuya ngami nje ngabe ukhuza ibuya kulo nyaka. Baningi abadlali abaqala ukugqama ngawo lo mqhudelwano okuyimanje benza ezibukwayo ebholeni elikhokhelwayo kuleli naphesheya kwezilwandle. Ngibona kusazothatha isikhathi ukuthi kuphinde kube khona umqhudelwano onjengalona” kusho uNdlovu.
Amagama abadlali aqala ukwaziwa ngalo mqhudelwano uThabo Cele okuRadomiak Radom yasePoland, uSphephelo “Toure” Sithole weBelenenses SAD yasePortugal, uKhanyisa Mayo okuCape Town City, uVelemsweni Ndwandwe weLamontville Golden Arrows, uNkanyiso “Pelembe” Zungu noSiphesihle Ndlovu abaku-Orlando Pirates ukubalwa abambalwa.
Umdlali wasePortugal uRenato Sanches ungomunye wabadlali abadlala kulo mqhudelwano egijima kuBenfica, kuyimanje udlalela iqembu lasefrance iLille uke wavela nasemabhukwini eBayern Munich yaseGermany.
UNdlovu kuyimanje ubhekelele ezemidlalo ngaphansi kukaMasipala waseMsinga. Usebenze namaqembu amaningi agijima kuVodacom League esiyaziwa nge-ABC Motsepe League lapho kubalwa iWembezi Juventus, i-Island, iDurban fc, Amajuba Five Killers neNatal United. Uphinde wasebenza nezikwati zakwaSAB zabangaphansi kweminyaka engama-21 KwaZulu-Natal.
Ebuzwa ukuthi angakujabulela yini aphinde asebenze noSiboniso “Nini” Vilakazi ongumqeqeshi eqenijini la-AmaZulu FC kuDStv Diski Challenge uthe: “Ngingajabula kakhulu ngeke ngaqamba amanga. Sisebenze iminyaka noSiboniso, sikuDurban FC sobabili abantu bawuncoma umsebenzi wethu saphinde saya kuKZN Academy senza okufanayo. Ngiyamhlonipha kakhulu uyalazi ibhola, kumele iziqhenye intsha ephuma ngaphansi kwesandla sakhe. Ngihlezi ngimfisela okuhle kodwa, ngoba ubudlelwano bethu buhle kakhulu” usho kanje.
Baningi abangasinambithisisanga kahle isinqumo sikaCele sokuyodlala ePoland, uNdlovu ngalokho uphawule wathi: “Kwaba yisinqumo esiphusile kakhulu esathathwa uThabo, kunokuthi abuye ezelapha eNingizimu Afrika. Ngifuna aqhubeke nokuzinza phesheya, bengifisa ukuthi adlale kuligi yaseSpain ngoba khona akubhekwa kakhulu ukuthi usulimele kangaki izwe lakho njengase-England. UThabo ayikho into engamhlula eqenjini elifana njengeVillareal, lapha ibhola libekwa phansi kudlale ubuhlakani lobu anabo uThabo” kusho uNdlovu.
Lo mqeqeshi eqhuba uthe: “Neqembu likaSithole ngiyabona ukuthi lizodliwa izembe kuligi enkulu ePortugal, kodwa engingamxayisa ngakho ukuthi aqhubeke nokudlala khona kulelazwe. Uma efuna ukushintsha izwe kube ukuthi uya eSpain” usho kanje.
UNdlovu uncome iPortugal ngokukwazi ukunikeza abadlali abancane ithuba beziveze. Wenza isibonelo ngoJoao Felix okuyimanje ogijima ku-Athletico Madrid yaseSpain esuka kuBenfica. Omunye uRuben Dias oyisiqonqwane seManchester City naye usuka kuBenfica encane.
