Now Reading
UPollock ubona ifika kude iProteas uma ibamba umgqigqo
Dark Light

UPollock ubona ifika kude iProteas uma ibamba umgqigqo

Usephonsele iqembu lesizwe lakuleli lekhilikithi inselelo yokuqumba phansi izikhondlakhondla zamazwe ahlonishwayo emhlabeni ukuze azibeke ethubeni eliyingqayizivele lokudla ubhedu kuWorld Test Championship.

IProteas ivutha ingabaselwe emidlalweni yamaTest. Njengamanje ihlezi endaweni yesibili emidlalweni yamaTest.

Isiqumbe phansi iWest Indies ekuhambeni, yathela othulini i-India ekhaya ngaphambi kokuthi ibambane neNew Zealand ekuhambeni.

Muva nje amuhluze iBangladesh ngo 2-0 emidlalweni emibili yochungechunge lwama-Test.

Ingwazi yeProteas, uShaun Pollock ophinde abe ngumsakazi kuthelevishini utshele elaboHlanga ukuthi elakuleli kuzomele libhaxabule amaNgisi ne-Australia ukuze lizibeke ethubeni lokudla umhlanganiso kuWorld Test Championship.

“Ukushaya i-England kuzoyibeka ethubeni elihle iProteas lokuthi inqobe iWorld Test Championship. Angeke kubelula ukukhipha amaNgisi esibayeni sawo. Yebo, wona ehlelwe yifomu. Asanqobe umdlalo owodwa kweli-15. Asanda kuxosha umqeqeshi. Siwathola ngesikhathi esahlakazekile ezama ukuhlanganisa izinto zawo. Azobe efuna ukuvuka ngathi. Uhla lwethu lokubhetha alukaqini ukhakhayi. Kunemibuzo eminingi okuzomele liyiphendule. Ngemuva kwalokho sizobhekana ne-Australia. Le midlalo esizoyidlala nala mazwe izosidwebela isithombe sokuthi sizohamba ibanga elingakanani kule World Test Championship,” kuchaza uPollock ohlezi endaweni yesibili ohlwini lwabashwibi abaphethe irekhodi lokuthatha amawikhethi amaningi kuProteas.

lElakuleli lihlezi endaweni yesibili ngamaphuzu angama-60 emveni kwemidlalo eyisikhombisa.

Lisele ngamaphuzu ali-12 ku-Australia esidlale imidlalo eyisishiyagalombili. Iqhwakele ngamaphuzu angama-72.

IProteas isinqobe imidlalo emihlanu yaguqa kwemibili.

“Impumelelo yeProteas incike ekubambisaneni kweqembu. Akekho umdlali ogqame kakhulu okubadlula bonke ikakhulukazi uma sikhuluma ngalaba ababhethayo. Wonke umuntu onikwe ithuba ubukeka elisebenzisa okwamanje. Lokhu kuyizimpawu zokuthi iqembu liyakhula. Okunye wukuthi iqembu liyalwa. Sibhekene nelaseNdiya sashaywa emdlalweni wokuqala kwathi kowesibili sabuya sase sinqoba nokawafawafa. Kwenzeke okufanayo eNew Zealand. Asiqalanga kahle kodwa sabuya ngamandla kowesibili. Leli qembu liyalwa. Wonke umuntu uyalilwela ifulengi lezwe,” kubeka uPollock owayengukaputeni wamaProteas.

Njengamanje isizini yekhilikithi eMzansi ivalile. 

NgoNcwaba elakuleli lizobhekana namaNgisi emidlalweni emithathu yochungechunge lwamaTest bese kuthi ngoZibandlela lishukane ne-Aussies ekuhambeni kwemithathu yamaTest.

“IWest Indies ngicabanga ukuthi besiyisimfivilithi yize besidlala ekuhambeni. NakuBangladesh wonke umuntu ubebheke amaProteas ukuthi anqobe. Lapho besinganikiwe khona ithuba yingesikhathi sibhekene ne-India neNew Zealand ekuhambeni. Nokho iqembu lidlale ngenhliziyo. Lizodinga ukwenza okufanayo kwelamaNgisi nase-Australia. Uma singashaya la mazwe akukho okuzoma endleleni yethu,” kulandisa uPollock.

See Also

Isizini entsha yekhilikithi izoqala ngoNhlangulana. IProteas izovakashela elamaNdiya lapho izodlala imidlalo emihlanu yeT20.

Ngemuva kwalokho izobhekisa amabombo kwelamaNgisi lapho izoqala khona ngemidlalo emithathu yosuku olulodwa neT20.

Izobe isidlulela e-Ireland ukuyodlala imidlalo emibili yeT20 ngoNcwaba. NgoMfumfu izofudukela e-Australia ukuyodlala iNdebe YoMhlaba yeT20.

“Kusamele siqinise amabhawodi uma sibhetha. Okwamanje sisadonsa kanzima. Akekho umdlali wethu onomgqigqo. Ukuze sikwazi ukukhonya emhlabeni kumqoka ukuthi ababhethi bethu bashaya amakhulu emigijimo. Okwamanje abashwibi yibona abasasinqobela imidlalo. Bayakwazi ukuthatha amawikhethi angu-20 imidlalo ngemidlalo.” kucacisa uPollock.

IProteas ishaye iBangladesh ngaphandle kwezithenjwa ezifana noMarco Jansen, uKagiso Rabada, uRassie Van der Dussen, u-Aiden Markram noLungi Ngidi bonke abebedlala ku-Indian Premier League (IPL).

“Ithimba labaqoki lizozithola esimeni lapho kumele likhethe phakathi kukashizi nobisi uma seliqoka abashwibi. KunoKagiso Rabada, uMarco Jansen, uLungi Ngidi, u-Anrich Nortje, uKeshav Maharaj noSimon Harmer. UHarmer noMaharaj benze kahle kakhulu sibhekene neBangladesh ngebhola nangebhethi. UJansen noRabada nabo bayakwazi ukubhetha. Kuzoba nzima ukuqoka iqembu labadlali abali-11 abazoqala umdlalo. Isimo esihle kodwa ethimbeni labaqoki nabaqeqeshi.” kuchaza uPollock.

Scroll To Top