Isikhulu sakwa-SAA sethembisa ukudala amathuba emisebenzi
Naphezu kokubuyelwa yithemba ngemisebenzi uthi okubenza bangenami ukwenyuka kukaphethroli kwakamuva okungaba nomthelela ezindizeni
ISikhulu Esiphezulu seSouth African Airways (CEO) uThomas Kgokolo uthi njengoba inkampani yezindiza ibuyelwa ngumfutho, izokwazi ukudala amanye amathuba emisebenzi. Ukuqinisekisile ukuthi iSAA ikhiphe abanye abasebenzi abebeyingxenye yohlelo lokuqeqesha oseluphelile.
“Kodwa inhloso yethu yesikhathi eside ukuthi njengoba sikhulisa inkampani yezindiza sengeza umthamo owengeziwe phakathi kwenethiwekhi yethu, sizobe sesihlinzeka ngamathuba emakethe ukuze sakhe amathuba emisebenzi eyengeziwe. Kuyadabukisa kakhulu futhi akuyona into umuntu ajabule ngayo. Asijabuli ngokususa abantu emisebenzini yabo ngoba siyawuqonda umthelela emindenini nasemiphakathini yabo. Kodwa bekufanele siqinisekise ukuthi siyasisindisa isisekelo seSAA futhi siyinika ithuba lokusinda,” kusho uKhokolo
UKgokolo uphinde wathi ukwenyuka kwentengo kawoyela okubhebhethekiswe ukuhlasela kweRussia e-Ukraine kungenzeka kudale ukunyuka kwezindleko zezindiza. I-SAA isanda kubuyisela umzila wayo phakathi kweGoli neTheku ngemuva kwekhefu leminyaka emibili. Izindiza emzileni ziye zamiswa ngenxa yokuthi iSAA ibekwe ngaphansi kokuhlengwa kwebhizinisi, kanye nomthelela wobhubhane lomhlaba wonke lokhuvethe. Inkampani yezindiza iphinde yaqala ukusebenza ezinyangeni ezine ezedlule ngokwethula kabusha izindiza phakathi kweGoli neKapa.
Ekhuluma nabezindaba eThekwini ngesikhathi bemukela indiza yokuqala phakathi kweTheku neGoli, uKgokolo uthe ukunyuka kwentengo kawoyela kungase kubeke engcupheni ukusebenza kweSAA. “Indiza yethu idla uphethiloli, ngakho-ke yinto okumele siyibheke. Siyazi ngokuqinisekile ukuthi izindleko zethu zizokhuphuka. Ngakho-ke kuzodinga thina njengabaphathi ngokusebenzisa ibhodi ukuthi sibheke ukwakheka kwezindleko zethu ukuze senze isiqiniseko sokuthi sisebenzisa izikhawu ezanele, siqinisekise ukuthi uma imvamisa ethile isinika izinombolo ezifanele zemali engenayo.”
NgoLwesibili, amalungu eSouth African Cabin Crew Association (SACCA) kanye neNational Union of Metalworkers of South Africa (NUMSA) kwaSAA baqokwe emahhovisi oMnyango Wezamabhizinisi KaHulumeni (DPE). Lezi zinyunyana ezimbili zithi lo mbhikisho umayelana nokuxoshwa kwabasebenzi abangu-225 osekugcwele, nokuqhubeka kwenkohlakalo nokungaphathi ngendlela kwaSAA phakathi kwezinye izikhalo.
