UShonga uvumbuke kwiSekhukhune
ISekhukhune United engomakoti kuligi enkulu yakuleli iDstv Premiership, kuvele ukuthi yandise iqembu ngabadlali abathathu asebenesikhathi begijima kuleli ngaphansi kwePremier Soccer League (PSL).
Leli qembu kuvele ukuthi lisayinise u-Evans Rusike, uJustin Shonga noLuckboy Mokoena.
URusike waseZimbabwe ugqame kakhulu egijima eqenjini laKwaZulu-Natal iMaritzburg United, wake wafunwa uthuli izinkunzi zaseSoweto iKaizer Chiefs wagcina ewelela eqenjini lasePitoli iSupersport United nangabanga nesikhathi esihle kuyona kwazise ubexinwa ukulimala. UShonga waseZambia ubonakalile kwi-Orlando Pirates, iTshakhuma Tsha Madzivhandila (TTM), iCape Town City ugcine esemabhukwini eqembu lase-Egypt i-Ismaily SC.
UMokoena wakuleli yena ugcine esemabhukwini eTS Galaxy phambilini uke walidlubha ijezi leHighlands Park, Real King, Ubuntu Cape Town neChippa United.
UShonga noRusike abangabagadli babhekene nomsebenzi onzima wokulwela ijezi kuChikube Ohizu, uLeepile Tlotlo, uNkanyiso Madonsela, uPrince Nxumalo, uCharlton Mashumba noThebang Sibanyoni.
Leli qembu kulogi lihlezi endaweni yesi-8, ngamaphuzu angama-25 emidlalweni eli-17.
Akugcinanga ukuthi liqinise eqenjini elikhulu kodwa nakuleli eliyibamba kweyeDstv Diski Challenge lenze okufanayo lisayinisa abafundi baseDoornkop uKgothatso Mathibe, uSlindile Nhlapho noSibongiseni Gabuza. Labadlali leli qembu libabone ngesikhathi benza ezibukwayo kumqhudelwano waseGoli obizwa ngokuthi iPhilly Games.
Ezinye izindaba ezithinta ukusayiniswa nokudayiswa kwabadlali, uNkanyiso “Pelembe” Zungu wePirates kuvele ukuthi ufuna ukukhulwa ileli qembu njengoba ijezi elizwa ngendaba nje, AmaZulu FC okuyiqembu akhulele kulona kuvela ukuthi lifuna ukumboleka. Kwenzeka lokhu nje uSiphesihle “Bafo” Ndlovu unqatshelwe iyona iPirates ukuthi aye kwiMaritzburg United abefuna imbolekise kuyona ukuze azothola ukudlala.
USiyethemba Sithebe obengumdlali wa-AmaZulu FC kuvela ukuthi useqede konke neChiefs, kuyimanje kuthiwa ukhona eNaturena nenombolo yejezi azoyigqoka ngathi useyikhethile.
ITS Galaxy imemezele uLifa Hlongwane noShane Roberts njengabadlali bayo abasha.
IRoyal AM kuvela ukuthi izohlukana noLucky Baloyi kanye noReagan Van der Ross abazoya kwiMaritzburg United, kube uRonald Pfumbidzai noSera Molebeng abakhonjwa kwiChippa United.
Kuvela ukuthi leli qembu elifike kwezwakala kuDstv Premiership, ilona elihamba phambili ekutheni lingasayinisa uHlompo Kekana wodumo kwiMamelodi Sundowns esayinise uSuprise Ralani osuka kwiCape Town City.