INigeria ibuye nawo egcwele amaphuzu ibhekene ne-Egypt
INigeria ikhombise unompempe ewususa nje umdlalo ukuthi iwafuna ephelele amaphuzu emdlalweni ebibhekene kuwona ne-Egypt. La maqembu abetholene phezulu emdlalweni wamaqoqo omqhudelwano omkhulu e-Africa i-African Cup of Nations (Afcon) ebanjelwe eCameroon.
INigeria lo mdlalo iwunqobe ngegoli elilodwa eqandeni. Lo mdlalo ububanjelwe eRoumde Adjia Stadium, eGaoua.
Ezika-Augastine Eguavoen, umqeqeshi weNigeria, ibidlala kahle ngesiwombe sokuqala ilandela izithunzi isikhathi esiningi iPharoes (i-Egypt). Leli qembu belikwenza kube lula ukugudla ngakwesokunxele lapho bekubhoke khona uMoses Simon ngasebunxele.
Lo mdlali ubekwazi ukugoba amabhola amahle, aphinde angene ngqo odongeni lwezitha, nokuyinto ebeyiyinika inkinga i-Egypt.
USimon ugcine eseba yizomfivilithi kubalandeli, njengoba ubesethi uma ebambe ibhola kuchwaze inhlwele.
Ukuyinyathela kahle kwe-Super Eagles kugcine kuthele izithelo ezinhle ngomzuzu ka-30 ngesikhathi, uKelechi Iheanacho ogijima kuligi enkulu i-English Premier League (EPL) yase-England, eshaya elihle igoli. Lokhu bekuyifanele iNigeria uma kubhekwa indlela ebiphaselana ngayo ibhola kakhulukazi esiswini.
Yize sekungene igoli uSimon akayekelanga ukungena udonga lwe-Egypt, ugcine esemakwa abadlali abathathu nokuyinto ebiyenza abanye abadlali beNigeria besale bodwa bedlale bekhululekile.
Isiwombe sesibili siqale kuyiNigeria ebifuna ukuqhubeka nokulimaza ezikaFaro ebezibukeka zifuna ukudlalela emuva isikhathi esiningi.
Ukaputeni we-Egypt uMohamed Salah ogijima kwiLiverpool FC yase-England, ubebhekwe ukuthi abe iphela endlebeni kulo mdlalo kodwa kubonakalile ukuthi abadlali beNigeria bebeyihlelile indlela abazomuvala ngayo.
USalah uqale ukubonakala sekuhlangane imizuzu engaphezulu kwengama-60, nalapho akhahlele khona ibhola kodwa langaba ingozi kakhulu kunozinti weNigeria u-Emile Okoye.
Lesi sikhwishikhwishi somdlali osebenzisa unyawo lesinxele uthole elinye ithuba ebhekene nonozinti kodwa wadlala ngalo.
Bekucaca ukuthi i-Egypt ibingekho nhlobo emdlalweni, izama nje uma kuvele ithuba ukuya phambili. Ngakolunye uhlangothi iSuper Eagles ibilokhu iyingozi uma ihlasela.
INigeria izobe ibheke ukuwina i-Afcon okwesine kulo mqhudelwano, kanti i-Egypt izama ukuyiwina okwesishiyagalombili.
I-Egypt uma nakumdlalo olandelayo izodlala kanje izosheshe iliwashe ijezi yize ithathwa njengelinye eliyizimfivilithi kulo mqhudelwano.
Komunye umdlalo i-Algeria okuyiyo evikela lo mqhudelwano iwuqale kabi njengoba idlale ngokulingana neSiera Leon. i-Algeria eholwa uRiyaad Mahrez iwakhandile amathuba kodwa ihluleke yancame ukuthola igoli