Ivule ngembudlu yamagoli eyeDStv Diski Challenge
Kube nenqwaba yamagoli ashayiwe emdlalweni yokuqala kulo nyaka yeDStv Diski Challenge kule mpelasonto.
Kuyona yonke imidlalo eyi-8 angenile amagoli, kweminye imidlalo kuqhume angaphezulu kwamahlanu.
AmaZulu FC vs Maritzburg United
La maqembu adabuka esifundazweni iKwaZulu-Natal acabelane amaphuzu, adlale ngokulingana ngegoli elilodwa nhlangothi zombili. Le miphumela ichaze ukuthi la maqembu azoqhubeka nokulandelana endaweni ye-10 kanye neye-11 kulogi.
Royal AM vs Kaizer Chiefs
Lo mdlalo iwona obe namagoli amaningi ube nayi-9 unqotshwe iRoyal AM ngamagoli amahlanu kwamane. Le miphumela iveze isithombe sokuthi iRoyal AM isiyiphuze inyongo iChiefs kwazise nakuDStv Premiership iyayibhaxabula. IChiefs izithole ihlezi endaweni engajwayele ukubona kuyona kulogi, ihlezi kweye-12 kanti i-AM yona iqhoqhobele kweyesi-9.
Marumo Gallants vs Chippa United
IChippa United iqhubekile nokufakela i-Orlando Pirates ingcindezi ehlezi esicngweni. Leli qembu lasePort Elizabeth libhaxabule kabuhlungu iMarumo Gallants ngamagoli amahlanu kwamabili. Kuyimanje leli qembu lisendaweni yesithathu kulogi ngamaphuzu angama-25 emdlalweni eli-12, iGallants yona isendaweni ye-13 ngamaphuzu ali-11 emdlalweni eli-12.
Stellenbosch vs TS Galaxy
IStellenbosch ayilishintshanga nhlobo igiya eshiye ngalo ngoZibandlela njengoba iwunqobile umdlalo wokuqala kulonyaka wezi-2022, ihlule iTS Galaxy ngamagoli amabili eqandeni. Leli qembu lihlezi iPirates ezithendeni njengoba linamaphuzu angama-27 lihlezi endawnei yesibili kulogi. ITS Galaxy yona ihlezi kweyesi-6.
Supersport United vs Cape Town City
La maqembu acazelane ngamaphuzu ngegoli elilodwa nhlangothi zombili. Nakulogi ayalandelana njengoba iSupersport United ihlezi endaweni yesi-7 kanti iCape Town City yona ikweyesi-8.
Baroka FC vs Lamontville Golden Arrows
IBaroka FC ize kulo mdlalo izimisele impela ukunqoba njengoba ibigadla ngomdlali ogijima eqenjini elikhulu nakuBafana Bafana u-Evidence Makgopa. Igcine inqobe ngegoli elilodwa eqandeni yabe isihlala endaweni yesine kulogi. Abafana Bes’thende (i-Arrows) yona ihlezi endaweni ye-14 ngokulingana neqembu elisemsileni iSwallows FC.
Sekhukhune United vs Swallows FC
Kulo mdlalo ophele ngokulingana, uphele kungene amagoli amane. La maqembu abhedelwa izinto njengoba kulogi ehlezi ezansi nje womabili anamaphuzu ali-10.
Orlando Pirates vs Mamelodi Sundowns
IPirates iqhubekile nokwenza kahle njengoba ihlule izimbangi zayo ngamagoli amatheathu kwamabili. Kuyenze yaba namaphuzu angama-30 esicongweni, iSundowns ejwayele ukwenza kahle yona ihlezi kweyesi-5 ngamaphuzu ali-19.