Umphakathi wakuleli unovalo kakhulu ngokugqekezwa ezindlini – ucwaningo
UMqondisi Kazwelonke Wezokushushiswa Komphakathi, uShamila Batohi, uthi kudingeka indlela entsha ngendlela ubugebengu obubekwe ngayo eqhulwini. UBatohi uthi iNational Prosecuting Authority (NPA) isifinyelele esiphethweni sokuthi ngeke ikwazi ukuqhubeka nokwenza izinto ngendlela ebihlale yenza ngayo.
Nakuba kukuningi okwenziwayo kodwa abantu abazizwa bephephile. Ethula kafushane iKomidi LePhalamende Lemisebenzi Yezobulungiswa Nezokuhlunyeleliswa Kwezimilo, uBatohi uthi akusanele ukubeka eqhulwini amacala asezingeni eliphezulu kuphela. Uthi sebexoxisane namaphoyisa ukuze baqale ukubeka phambili ukugqekezwa kwezindlu. UBatohi uthi ucwaningo selukhombisile ukuthi lobu yibona bugebengu obusatshwa kakhulu abantu.
“Sibheke ukubeka phambili lezi zinhlobo zobugebengu, ukuze ngokubambisana nozakwethu kwaSAPS sibe nendlela egxile kakhulu eqhutshwa izibalo mayelana nokuthi sibeka kuphi eqhulwini futhi siqinisekise ukuthi siyakwazi ukukala ubugebengu. Umthelela, futhi ngethemba ukuthi iqondise kulawo maqembu ezigebengu abandakanyeka ekugqekezeni izindlu futhi engabhekani nomuntu ogqekeza ongaziwa lapha. Sifuna ngempela ukubheka labo abenza umsebenzi wokugqekeza izindlu.”
IKhomishini Yamaqiniso Nokubuyisana
Amalungu ePhalamende anxuse iNPA ukuba yenze ukuphothulwa kwamacala ahlobene neKhomishini Yamaqiniso Nokubuyisana kube yinto ehamba phambili kuyo. INhloko Yezokushushiswa u-Adv uRodney de Kock uthi uphenyo lweTRC lusemahhovisi obugebengu obuhleliwe ezifundazweni ezahlukene. Uthi baqoke abashushisi abazinikele ukuthi babhekane nala macala isikhathi esiyiminyaka emithathu. UDe Kock uthi oKlebe baphinde baqoka abaphenyi abazinikele ukuthi basebenze ngamacala eTRC kuphela.
”USihlalo weKomiti uMnu uBulelani Magwanishe uthi kubalulekile ukuthi la macala asukunyelwe ngokushesha. “Ngicabanga ukuthi ukungaphatheki kahle kwethu kusekelwe eqinisweni lokuthi usuku ngalunye oludlulayo kuba nzima nakakhulu ukushushisa lawo macala ngoba abantu abenza lawo macala sebebadala kakhulu manje. Ngakho usuku ngalunye oludlulayo luba nzima kakhulu, kodwa kuyinto okufanele sibambisane ukuze siqinisekise ukuthi izwe lethu liba yindawo engcono yokuhlala kuyo.”
Ezokuphepha
UMagwanishe uthi kubalulekile ukuthi abezokuphepha ezweni baxhaswe ngendlela efanele. Uthi ukwehluleka ukuqinisekisa ukuthi lokhu kungaholela ekulimaleni kwezokuphepha zezwe.
UMagwanishe uthi, “Ngicabanga ukuthi umbono okufanele siwuthathe owokuthi esikhathini eside uhlelo lwezobulungiswa bobugebengu belungenamali futhi lubuya luzosiluma. Futhi masingalindi kuze kufike isikhathi lapho sinephekula ezweni lakithi ukuze sithole ukuthi ibutho lethu alikalungi. Uphiko lwethu lwezobunhloli alukalungi kanti nezokushushiswa kwethu azikalungi.”