Ngale kwewindi amaqembu nebhola lomhlaba akusefani
NgoLwesibili bekuwusuku lokugcina kuvulwe iwindi lokusayiniswa abadlali. Phesheya kwezilwandle leli kube yiwindi lokusayiniswa kwabadlali elingasoze lakhohlakala emlandweni kanobhutshuzwayo.
Okwenza lokho yingoba abadlali ababili abahamba phambili emhlabeni, uLionel Messi noCristiano “CR7” Ronaldo babe ngabanye abathole amakhaya amasha kuleli windi.
UMessi obesechithe iminyaka engaphezulu kwengama-20 neqembu laseSpain iFC Barcelona ujoyine iParis Saint-Germain (PSG) yaseFrance. Lokhu kuyinto ethuse abaningi kwashiya abathandi bakanobhutshuzwayo baseSpain belila. Umthelela kaMessi ubonakalile njengoba iligi yaseFrance iFrench 1 isikeliswe njengeyi-5 emhlabeni.
URonaldo yena uphindele eqenjini aseke agijima kulona iManchester United yase-England esuka kwiJuventus. IJuventus uyijoyine ngonyaka wezi-2018 esuka eqenjini laseSpain iReal Madrid. Kunyakaze umhlaba kusabalala izindaba zokuthi kungenzeka ajoyine iManchester City. Ubesezingxoxweni nayo kodwa uSir Alex Ferguson owake waba ngumqeqeshi weMan United wanxenxa lo mdlali (uRonaldo) ukuba abuyele ekhaya.
Labadlali basayine iminyaka emibili kula maqembu, banelungelo lokuthi begavuselela uma bephelelwa inkontileka. Omunye umdlali omangaze abaningi u-Antoine Griezman oqome ukubuyela kwi-Atletico Madrid esuka kwi-FC Barcelona. Izinto azimuhambelanga neze kahle kusukela ajoyina iFC Barcelona.
Abanye abadlali abajoyine amaqembu amasha kungalindele muntu kube nguSergio Ramos osuke kwiReal Madrid noGeorgino Wijnaldum obekwiLiverpool FC yase-England bajoyina iPSG, uRomelu Lukaku osuke kwi-Inter Milan abenqobe nayo iligi yase-Italy wabuyela kwiChelsea FC yase-England, uSaul Niguez osuke kompetha baseSpain i-Atletico Madrid wajoyina iChelsea FC.
UWillam obeku-Arsenal ujoyine iqembu langakubo eBrazil iCorinthians, uDavid Alaba osuke kompetha baseGermany iBayern Munich wajoyina iReal Madrid, uRaphael Varane ushiye iReal Madrid wajoyina iManchester United, uJack Grealish ushiye i-Aston Villa wabe esejoyina iMan City.