Azolwela ukuqeda isinyama amaqembu azobamba iqhaza kumqhudelwano weMTN8
Ushikishi lwemidlalo yeWafa Wafa luzoqala ngoMgqibelo ePrincess Magogo Stadium, KwaMashu ngehora lesi-3 ntambama ngendumezulu yomdlalo ozoba phakathi kweLamontville Golden Arrows neSuperSport United.
Abafana Bes’thende sekuphele iminyaka eyishumi nambili bagcina ukuphakamisa inkomishi.
Ngowe-2009 ngaphansi kobuholi bukaManqoba Mngqithi, leli qembu laseLamonti labhubhisa i-Ajax Cape Town ngamanqaku ayisi-6 eqandeni e-Orlando Stadium kowamanqamu.
Le nkomishi kwaba ngeyokuqala yaBafana Bes’thende esigabeni esikhokhelayo. Kusukela lapho-ke i-Arrows ayiphindanga yahlabana ngesicoco. Kuze kube yimanje kusacwebe iziziba.
Umqeqeshi omusha we-Arrows, uLehlohonolo Seema uzobe ebheke ukuqeda leli shobolo uma ezakhe sezibhekene namaTsatsantsa asePitori Esinqawunqawini ngesabatha.
USeema uthathe indawo kaMandla Ncikazi oseku-Orlando Pirates. Akungatshazwa ukuthi Abafana Bes’thende bazothwala kanzima uma befuna ukuwashisa iSuperSport ijezi.
Phela leli qembu lasePitoli selizakhele igama ngokubanga ukushisa emiqhudelwaneni yemikhumulajezi.
Ngo-2019, iSuperSport iyona edle ubhedu kuMTN8 iguqisa iHighlands Park e-Orlando Stadium.
Ngehora lesi-6 ntambama ngawo uMgqibelo, ompetha beMTN8, i-Orlando Pirates bazoqala umkhankaso wabo wokuvikela isicoco sabo e-Orlando uma sebedudulana nabakhaya iSwallows FC.
EZimnyama ziqede ishobolo leminyaka eyisithupha ziphuthwa yizindebe ngesizini edlule ngesikhathi zithela othulini iBloemfontein Celtic ngamanqaku amabili kwelilodwa eMoses Mabhida Stadium, eThekwini.
ISwallows ibiqeda isizini yayo yokuqala ibuyele esigabeni esikhulu ngemuva kwamasizini yagawulwa yizembe.
Izinyoni zizobe zibheke ukundizela phezulu ngoMgqibelo uma sezitholana nePirates.
ISwallows sekuphele iminyaka eyisishiyangalolunye yagcina ukunqoba indebe esigabeni esiphezulu.
Kule sizini izobe ibheke ukuqeda le ndlala yezicoco. Selokhu yagcina ukunqoba indebe ngo-2012 ngesikhathi iphakamisa iMTN8. Yaguqisa iSuperSport kowamanqamu.
NgeSonto wonke amehlo azothi njo kuKaizer Chiefs neMamelodi Sundowns eLucas Moripe Stadium ngehora lesi-3 ntambama.
Amakhosi namaBrazillians nawo alangazelele ukuqeda isinyama kulo mqhudelwano.
Yize iSundowns isiphenduke amakhosi ezindebe eNingizimu Afrika kodwa isalokhu izabalaze njalo ukuqukula iMTN8.
Selokhu lo mqhudelwano waqala ukuxhaswa yinkampani yezokuxhumana u-MTN, iSundowns ayikaze iwunqobe.
Sekuphele iminyaka eyoshuminane leli qembu lasePitoli lihluleka wukwenza kahle kuMTN8.
ISundowns yagcina ngo-2007 isacijwa nguGordon Igesund ukukhonya kulo mqhudelwano odlalwa amaqembu aqede ebalwa nayisishiyangalombili phezuli ku-log.
Ngaleso sikhathi wawusabizwa ngeSAA Super Eight. ISundowns yacoboshisa iPirates ngo 1-0 wephenathi kaBrent Carelse.
IChiefs nayo sekuphele iminyaka eyisikhombisa yagcina ukudla ubhedu kuMTN8.
Amakhosi yiwona aphethe izicoco eziningi emlandweni walo mcintiswano. Aphethe uxhaxha lwezicoco eziyoshuminane.
Ngemuva kokuhluleka wukunqoba izicoco ngaphansi kobuholi bukaSteve Komphela, Giovani Solinas, Ernst Middendorp noGavin Hunt, iZimpofana zikhethe ukubuyisa Stuart Baxter.
Phela leli Ngisi yilona elagcina ukuletha izinsuku zenjabulo eNaturena linqoba iMTN8 neligi ngo-2014/15 ngaphambi kokuthi lishiye Abafana Bokuthula Noxolo.
Emdlalweni wokugcina wama-qaurterfinal eMTN8, AmaZulu azoshikilisana neCape Town City Moses Mabhida Stadium ngehora lesi-5 ntambama.
USuthu ludonsa iminyaka engama-28 lagcina ukunqoba isicoco. Ngemuva kokuqeda endaweni yesibili ku-log, luzovuseleleka.
UBenni McCarthy ocija Usuthu iyamvuma inkundla iMoses Mabhida. Unqobe isicoco sakhe sokuqala njengomqeqeshi kuyona le nkundla ngo-2018.
Waqumba phansi iSuperSport United kumaphenathi nayo iCity azobhekana nayo ngeSonto.
Kuyona le nkundla yaseThekwini unqobe inqwaba yezicoco esadlalela iPirates.
Waphakamisa isicoco seligi neTelkom Knockout. Ngakho ngeSonto uzogaba ngalo leli rekhodi lakhe uma esebhekene neqembu lakhe elidala.
Ngakolunye uhlangothi amaCitizen agcina ukuwunqoba lomqhudelwane ngo-2018 kusekhona uMcCarthy. Kula masizini amabili adlule iCity ihlulekile ukunqoba lesi sicoco.
Ngasekupheleni kwesizini edlule iCity ibuyise u-Eric Tinkler ngethemba lokuthi izobuyisa izinsuku zempumelelo. Leli yithuba elihle lokwenza isiqiniseko sokuthi ezakhe ziqala isizini ngegiya eliphezulu.
Nokho uBenni nezakhe angeke bavume kalula ngoba bayabazi ubumqoka bokunqoba lo mqhudelwano ohamba nezigidi.