Kuminyene utshumo kuF1 kulo nyaka, ingqwele ibhekwe kwababili
Kuyasuka lokho kule mpelasonto emqhudelwaneni wezimoto iFormula One (F1) okubhekwe okuningi kuwona kulo nyaka.
Okuzobe kubhekwe kakhulu ukubona umpetha uLewis Hamilton eqhubeka nokwephula amarekhodi okubalwa kuwona nelokuba umshayeli wokuqala ukunqoba imiqhudelwano eli-100.
Elinye elokuba ngaphezulu kukaMichael Schumacher ngokuba ngumpetha kayisi-8 kwazise yena noSchumacher sebebengompetha kayisi-7. Umqhudelwano ozovula ngoweBahrain Grand Prix ozokuba ngeSonto eSakhir ngelesi-5 ntambama.
UDamon Hill owaba ngumpetha womhlaba ngonyaka we-1996, uthe lena kuzoba isizini ezoba neziwombe ezijabulisayo.
“UHamilton benoMax Verstappen ngibona kuyibo abazoba sembangweni wokunqoba isicoco sakulo nyaka. Njengoba kunemiqhudelwano eminingi kangaka nje kuzoshuba,” kusho uHill.
Umlando uveza ukuthi asebenqobe iBahrain Grand Prix, uHamilton noSebastian Vettel izikhawu ezine.
UVettel wanqoba ngonyaka wezi-2012, ngowezi-2013, ngowezi-2017 nangonyaka wezi-2018 kanti uHamilton yena unqobe ngonyaka wezi-2014, ngowezi-2015, ngowezi-2019 nangowezi-2020.
“Yize kuzoba khona umqhudelwano yonke izoba ngeshiya abalandeli bengawuvali umlomo, kodwa angingabazi ukuthi uHamilton uzophula aphinde azibekele amarekhodi. Akwenze nyakenye ngibona ekuphinda, uma enganqoba imiqhudelwano embalwa nje akekho ozombamba. Utshengisile eminyakeni edlule ukuthi kungani ehlonishwa kangaka kulo mdlalo,” kusho uHill.
Omunye obona uVerstappen ozoba ingozi kulo nyaka kuHamilton uMartin Brundle.
UVerstappen ushayela ngaphansi kweRed Bull Racing lapho ebambisene khona noSergio Perez.
“UVerstappen ungumshayeli oseqophelweni eliphezulu. Ngiyethemba ukuthi kulo nyaka uyena ozobe enikeza uHamilton inking,” usho kanje.
Uphinde washo ukuthi uHamilton uzomjabulela ukumbona ezibekela amarekhodi akhe kulo nyaka futhi ubona amarekhodi azowabeka kuzothatha iminyaka engaziwa ukuthi aphulwe.
Imiqhudelwano yeF1 kulo nyaka IBahrain Gran Prix, i-Emilia Grand Prix, iPortugesse Grand Prix, iSpanish Grand Prix, iMonaco Grand Prix, i-Azerbaijan Grand Prix, iCanadian Grand Prix, iFrench Grand Prix, i-Australian Grand Prix, iBritish Grand Prix, iHungarian Grand Prix, iBelgian Grand Prix, iDutch Grand Prix, i-Italian Grand Prix, iRussian Grand Prix, iSingapore Grand Prix, iJapanesse Grand Prix, i-United States Grand Prix, iMexico City Grand Prix neSaudi Arabian Grand Prix.
Izimoto nabashayeli beF1
- i-Alfa Romeo Racing Orlen: UKimi Raikkonen no-Antonio Giovinazzi
- iScuderia Alpha Touri Honda: UPierie Gasly noYuki Tsunonda
- i-Alpine F1 Team: UFernando Alonso no-Esteban Ocon
- i-Aston Martin: USebastian Vettel noLance Stroll
- iFerrari: UCharles Leclerc noCarlos Sainz Jr
- iHeas F1 Team: UNikita Mazepin noMick Schumacher
- iMclaren: UDaniel Ricciardo noLando Norris
- iMercedes: UValterri Bottas noLewis Hamilton
- iRed Bull Racing: USergio Perez noMax Verstappen
- iWilliam Racing: UNicholas Lafifi noGeorge Russel