Zehluleke zancama izethenjwa ukudlulisela amaqembu azo kowe-Uefa
UCristiano “CR7” Ronaldo uphinde wehluleka ukusiza iJuventus FC ekutheni inqobe umqhudelwano omkhulu wamaqembu kanobhutshuzwayo emhlabeni i-UEFA Champions League.
Ngesikhathi iJuventus FC egijima e-Italy isayinisa uRonaldo, inhloso yayo kwakuwukuthi asize leli qembu liqede ishobolo lokungayinqobi i-UEFA Champions League.
Kumasizini amathathu efikile kuleli qembu uRonaldo ongowokudabuka ePortugal, iJuventus FC engompetha beSeria A ayidluli kumaQuarter-Final njengoba kulokhu iphume kuLast 16.
URonaldo unomlando omuhle kulo mqhudelwano njengoba esewunqobe kahlanu neManchester United yase-England neReal Madrid yaseSpain ngokwehlukana.
IJuventus FC kulo mqhudelwano iwashiswe ijezi iqembu lasePortugal elake lagijinyelwa ilowo osengumqeqeshi wa-AmaZulu FC uBenni McCarthy, iFC Porto.
Iphume kabuhlungu njengoba isale ngenxa yomehluko wamagoli iqembu eliwashaye ekuhambeni. Emlenzeni wokuqala IFC Porto yanqoba ngamgoli amabili kwelilodwa, kowesibili kwanqoba iJuventus FC ngamathathu kwamabili. Yabe isidlulela phambili iPorto FC ngokuthi yakwazi ukushaya amagoli amaningi enkundleni yeJuventus FC.
Kule sizini yangowezi-2020/21 iJuventus FC eteketiswa ngokuthi i-Old Lady, isemathubeni okuthi inqobe iCopa Italia okuwumqhudelwano wase-Italy. Kuwona isikowamanqamu nalapho izobhekana khona ne-Atalanta mhla zili-19 kuNhlaba nonyaka.
Kuligi izinto ziyayibhimbela i-Old Lady, ngokujwayelekile kuye kube yiyo ezihola phambili kulogi kodwa muva nje akunjalo. Iqembu elizihola phambili i-Inter Milan enamaphuzu angama-62 emva kwemidlalo engama-26.
I-Old Lady yona ihlezi endaweni yesithathu ngamaphuzu angama-52, emva kwemidlalo engama-25. Lokhu kuchaza ukuthi isele ngamaphuzu ali-10, iqembu elisendaweni yesibili i-AC Milan yona enamaphuzu angama-56 emidlalweni engama-26.
Lowo owayengumqeqeshi weMan United uSir Alex Ferguson, uthe ubona kunzima ukuthi uRonaldo angakwazi ukusiza iJuventus FC iqede ishobolo.
“Ngesikhathi labo mpetha base-Italy besayinisa uRonaldo bakubeka kwacaca ukuthi bafunani kodwa lokho ngibona bengeke bakuzuze. Iminyaka yakhe ayisavumi, kwakumele bemusayinise eminyakeni edlule lapho ayesasefomini khona. Lokho kuwumbono wami” kusho uSir Ferguson.
Eqhuba uthe: “Kwakuyilungelo layo iJuventus FC uma ithi ifuna ayinqobise i-UEFA Champions League uRonaldo ngoba vele ayinankinga yokunqoba iligi. Ngingasho ngithi ngiyaziqhenya ngaye uRonaldo, ukwazile ukuthi azithwalise ijoka elinzima. Uzamile okungangasemandleni akhe.”
Ube esethi kukuyena ukuthi uyaqhubeka nokuthi azame nangesizini ezayo noma uyashiya.
“Angisoze ngamthathela izinqumo, uyena owaziyo umzimba wakhe lo adlala ngawo. Ungumuntu ongesona isahluleki, engikholwa ukuthi angaqhubeka afune ukuzama ukunqoba lo mqhudelwano naleli qembu. Silindele yena ukuba simuzwe esho okusenhliziyweni yakhe uma kuphela isizini,” kusho uSir Ferguson.
Omunye umdlali ohlulekile ukusiza iqembu lakhe ukuthi lidlulele esigabeni esilandelayo nguLionel Messi weFC Barcelona yaseSpain.
ezikaMessi zikhishwe ompetha baseFrance iParis Saint-Germain (PSG) ngamagoli amahlanu kwamabili uma kubalwa yomibili imilenze. kungokokuqala kusukela ngesizini yangowezi-2004/05 ukuthi amaQuarter-Final alo mqhudelwano adlalwe ngaphandle kwalezi zingqungqulu ezimbili.
Amaqembu asedlulele phambili iLiverpool FC yase-England, iBorussia Dortmund yaseGermany, iPSG kanye neFC Porto.
Ngesonto elizayo kuzodlalwa imidlalo emine lapho kulindelwe amaqembu amane azodlulela phambili, bese kuthi ngoLwesihlanu kuqhathwe amaqembu azodlala amaQuarter-Final okuyiReal Madrid ezodlala ne-Atalanta, iMan City ezodlala neBorussia M’gladbach, iChelsea FC ene-Atletico Madrid, kube iBayern Munich ezodlala neLazio.