Now Reading
Akuvumanga iqophe umlando intokazi kaWilliams kwezomphebezo
Dark Light

Akuvumanga iqophe umlando intokazi kaWilliams kwezomphebezo

nguSabelo Maphumulo

UNaomi Osaka uphule izinhliziyo zabalandeli bebhola lomphebezo abaningi izolo (ngoLwesine) ekuseni eguqisa imfivilithi kwabesifazane uSerena Williams emdlalweni owandulela owamanqamu e-Australian Open.

U-Osaka wehlule uWilliams ngo-6:3, 6:4 okungathathanga isikhathi esingakanani ukuthi lo mdlalo uphele yize bekulindeleke ukuthi udonse ngenxa yokuthi buyaziwa ubuchule balaba bobabili.

Okwenze u-Osaka aphule izinhliziyo zabaningi ukuthi abaningi bebefisa ukubona uWilliams edlulela kowamanqamu nalapho ebezoba semathubeni okuqopha umlando.

Umlando obuzoqoshwa ile ntokazi eyaqala ukudlala umdlalo womphebezo okhokhelwayo ngowe-1995 wukufica uMargaret Court ngokunqoba amaGrand Slam amaningi kulo mdlalo.

UCourt washiya kulo mdlalo enqobe amaGrand Slam angama-24 kanti uWilliams yena usenqobe angama-23. Ubezophinda azifake emlandweni wokunqoba i-Australian Open kayisi-8 okuyimanje yena noCourt basayinqobe ngokulingana kayisi-7.

Uma kukhulunywa ngamaGrand Slam kushiwo imiqhudelwano ehlanganisa iWimbledon, i-US Open, iFrench Open ne-Australian Open. 

UWilliams unqobe iWimbledon kayisi-7 ngonyaka wezi-2002, ngowezi-2003, ngowezi-2009, ngowezi-2010, ngowezi-2012, ngowezi-2015 nangowezi-2016, unqobe i-US Open  kayisi-6 ngowe-1999, ngowezi-2002, ngowezi-2008, ngowezi-2012, ngowezi-2013 nangowezi-2014, wanqoba iFrench Open kathathu ngowezi-2002, ngowezi-2013 nangowezi-2015. 

Ube esedla i-Australian Open kayisi-7 ngonyaka wezi-2003, ngowezi-2005, ngowezi-2005, ngowezi-2007, ngowezi-2009, ngowezi-2010, ngowezi-2015 nangowezi-2017.

ngowezi-UWilliams oneminyaka yobudala engama-39 indlela adlale ngayo ebhekene no-Osaka ukhombisile ukuthi iminyaka isihambile kuye. Kuyimanje ukleliswe endaweni ye-10 ngokwezikeliso zeWomen Tennis Association (WTA) kanti u-Osaka usendaweni yesithathu.

Abaningi emva kokwehlulwa kukaWilliams bancome ukuthi athi khumu kulo mdlalo njengoba iminyaka ingasamuvumeli.

See Also

Unomlando ongasoze walibaleka kwezomphebezelo ngokuthi akeliswe endaweni yokuqala kusukela ngoNtulikazi wezi-2002 kwaze kwaba ngowezi-2017. Phezu kwalokho uke wanqoba izindondo zamagolide emdlalweni wama-Olympics Games.

UWilliams ekhuluma nabezindaba emva komdlalo ukhombisile ukuthi umoya wakhe uphukile njengoba ebelokhu ekhihla eseNdlovukazi uNandi.

Ephawuma uthe: “Usuku engingasoze ngalukhohlwa. Angazi. Sengiqedile,” wabe ephuma ehamba ekhala.

Ephawula u-Osaka emva ko mdlalo uthe: “Kuyisifiso sanoma imuphi umdlali ukubhekana noWilliams, bengisaba futhi ngethukile. Yize bekunjalo kodwa bengilwela ukungaphumi kulo mqhudelwano, ingakho ngenze konke okusemandleni ukuwunqoba lo mdlalo.”

Umdlalo wamanqamu uzokuba kusasa ngele-10:30 lapho u-Osaka ezotholana phezulu noJennifer Brady/Karolina Muchova.

Scroll To Top