Ikhekhe iMadeira elinokunambitheka kukalamula

IMadeira uhlobo lwekhekhe oluthandwa cishe umhlaba wonke. Ubulula balo kanye nokunambitheka kungezinye zezizathu ezenza lithandeke kangaka. Ngenxa yezithako zalo ezimbalwa, impela noma ngubani angalibhaka. Leli khekhe lidinga izithako ezine nje qha: ibhotela, ushukela, amaqanda kanye noflawa. Nokho-ke, sezikhona izindlelakwenza ezinezithako ezithe ukuthi xaxa zaleli khekhe abantu asebezisungulele zona muva nje. Uma ungumlandeli wale ngosi uzokwazi ukuthi mina ngiyazifela ngolamula, ngakho elami linolamula kanye newolinsthi. Leli khekhe ungalithokozela njengedessert lihambisana nokhastadi okanye iyogathi noma uliphelezele nje ngetiye.

Kungenzeka ukuthi usuke wezwa izinkulumo eziningi ngomsuka okanye umlando waleli khekhe. Kukaningi ngizwa abantu bethi leli khekhe libizwa ngeMadeira nje ngenxa yokuthi lasungulwa esiqhingini sasePortugal, iMadeira. Kanti abanye banenkolelo yokuthi igama lalo livela ekutheni esinye sezithako zalo iwayini iMadeira. Zombili lezi zinkulumo nokho akukho okuveza ukuthi ziliqiniso. Ngokosomlando abaningi kukholelwa ukuthi leli khekhe labonakala okokuqala eBritain. Kunenkolelo yokuthi indlelakwenza yokuqala ngqa yashicilelwa ngonyaka we-1845. 

---

Ikhekhe iMadeira

• Izithako (amabhiskidi)
• Ama-225g ebhotela elithambile, elingaphumi efrijini.
• Inkomishi eyodwa (1) yeCaster Sugar.
• Izipuni zokudla ezintathu (3) zesikhumba sewolintshi esigrethiwe.
• Ithispuni elilodwa (1) lesikhumba sikalamula esigrethiwe.
• Amaqanda amakhulu amathathu (3) angaphumi efrijini.
• Inkomishi eyodwa (1) kaflawa ozikhukhumalelayo.
• Amakota amathathu (3/4) enkomishi kaflawa ongenalutho.
• Ingxenye (1/2) yenkomishi yobisi olungaphumi efrijini.

Indlelakwenza 

• Shisisa uhhavini ngokuwubeka ku-1800 C.
• Lungisa ipani lokubhaka isinkwa (elijule ngama-6cm) ngokulifaka iphepha lokubhaka. Qiniseka ukuthi iphepha likapakela ngaphandle ukuze kube lula ukukhipha ikhekhe lapho selibhakiwe.
• Endishini enkulu, faka ibhotela, ushukela, isikhumba sewolitshi kanye nesikalamula.
• Shaya ngomshini kagesi ngesivinini esimaphakathi nendawo, ingxube kuze kube ngathi iyakhukhumala, ithofozele.
• Faka iqanda elilodwa ngesikhathi, ushaye ngomshini emva kweqanda ngalinye. Qinisisekisa ukuthi amaqanda ahlangana ngokuphelele.
• Sefa uflawa (zombili izinhlobo) uzifake kule ngxube esihlanganisiwe bese uhlanganisa ngokhezo, hhayi ngomshini kagesi. Qikelela ukuthi ungahlanganisi ngomfutho.
• Thela ingxenye yobisi, uqhubeke uhlanganise ngokhezo.
• Faka le ngxenye yobisi esele, uphinde futhi uhlanganise ngokhezo, ngesineke.
• Uma usugculisekile ngokuhlangana kwenhlama, yithele epanini lokubhaka bese ulinganisa ngokhezo phezulu.
• Faka ipani kuhhavini oshisayo, ubhake imizuzu ephakathi kwengamashumi amane nanhlanu (45) nengamashumi amahlanu (50).
• Ukuhlola ukuthi ikhekhe selivuthiwe na, shutheka uthi lokuvungula phakathi nendawo nekhekhe. Uma luphuma luhlanzekile, kuyobe kusho ukuthi selivuthiwe ikhekhe. Uma liphuma limanzi, qhubeka ulibhake cishe imizuzu eyisikhombisa (7) ngaphezulu. 
• Khipha ikhekhe kuhhavini uliyeke epanini cishe imizuzu elishumi (10).
• Emva kwemizuzu elishumi, likhiphe epanini, ukhiphe nephepha ukuze lithi ukuphola.

Amasu

• Leli khekhe ngilithokozela kakhulu lapho lisafudumele lihambisana nokhastadi. Kodwa ungalithokozela noma seliphole ngokuphelele. Angikuncomi nokho ukulibeka efrijini ngaphambi kokulidla.
• Ungaligcina esitsheni esivaleka ngci kuze kube izinsuku ezine (4) ngaphandle kokuthi lonakale. 
• Ungakwazi futhi ukulibhaka emapanini amabili azindilinga leli khekhe bese ulihlanganisa ngokhilimu. 
• Ungalihlobisa ngokuthela i-icing phezulu bese uvuvuzela isikhumba sikalamula esigrethiwe noma ubeke izingcezu zikalamula.

Ngingajabula ukuzwa ukuthi kuhamba kanjani eziko lakho. Lokhu ungakwenza ngokungithumelela i-imeyli ku: szungu@nkzgroup.co.za