Now Reading
UMalema uthi awukhokhe uKhongolose ngolwaseZimbabwe
Dark Light

UMalema uthi awukhokhe uKhongolose ngolwaseZimbabwe

Umholi we-Economic Freedom Fighters (EFF) uphonsele inselelo uMnyango Wezokuvikela kuleli osolwa ngokuvumela abaholi be-African National Congress (ANC) ukuba bagibele indiza yombuso ohambweni lwabo lwaseZimbabwe ukuba ubakhokhise ngalokhu.

UMalema ukusho lokhu namhlanje ekuseni ngaphambi kokuba avele eNkantolo yaseRandburg benoDkt uMbuyiseni Ndlozi ngecala lokushaya iphoyisa emngcwabeni wesigomagoma somzabalazo, UNkk uWinnie kaMadikizela Mandela ngowezi-2018.

“Udaba lwaseZimbabwe lusithinta sonke njengeNingizimu Afrika ngakho esikhundleni sokubanga umsindo kufanele uMnyango Wezokuvikela uthumelele I-ANC amaphepha enkokhelo (invoice) okumele iyikhokhe ngalolu hambo,” kusho uMalema. 

Lolu daba selususe umsindo njengoba izinhlaka zamalungelo okubalwa ne-Afri Forum zifuna akhonjwe indlela uNgqongqoshe walo Mnyango, uNkk uNosiviwe kaMaphisa, ngokuvumela abaholi be-ANC ukuba bathole usizo lokundiziswa umbuso kungafanele. 

ukaMaphisa ubeyingxenye yabaholi be-ANC abebeyohlangana nobuholi benhlangano ebusayo kuleliya zwe eliwumakhelwane wakuleli okuyiZanu-PF. 

Kulaba baholi bekukhona uNobhala jikelele we-ANC,  uMnu u-Ace Magashule, uNksz uLindiwe Zulu nabanye. 

IDemocratic Alliance (ANC) nayo ihlabe ikhwele lokuba okaMaphisa athathelwe izinyathelo. 

Ithe lokhu okwenziwe abaholi be-ANC ukuba bayohlangana neZanu-PF kodwa besebenzisa Indiza yezokuvikela kuyicala elibomvu futhi kuwubusela. 

See Also

NgeSonto uMengameli uRamaphosa unikeze okaMaphisa amahora angama-48 ukuba acacise ukuthi kungani evumele ithimba lezithunywa ze-ANC ukuba zigibele indiza yezokuvikela. 

Lokhu sekuvuse inyama endala ogqokweni njengoba kuthiwa okaMaphisa wake wasebenzisa indiza yombuso ukushushumbisa intombi yendodana yakhe engsekho emhlabeni uChumani. 

Khonamanjalo icala likaMalema noNdlozi lihlehliselwe inyanga ezayo uMfumfu. 

Scroll To Top