UPitso “uqhumise ibhomu” kwethuka abalandeli
Zishiye abathandi bakanobhutshuzwayo beshaqekile izindaba zokuthi uPitso “Jingles” Mosimane obengumqeqeshi weMamelodi Sundowns wesulile.
Lezi zindaba zisabalale namuhla ekuseni, yize isizathu sokusula kwakhe singaveli kodwa umthombo ongaphakathi kuleli qembu uthe lo mqeqeshi wesule ngoMsombuluko.
“UMosimane wesule ngoMsombuluko yize kungaphunyelwa obala ngesizathu esenze asule kodwa khona kunjalo. Ngikhuluma nje uzoba nomhlangano nomengameli weqembu ukudingida lolu daba,” kusho umthombo.
Okwenza kushiye abantu beshaqekile ngokusula kukaJingles, yingoba ubesanda kuvuselela inkontileka yakhe ngeminyaka emine naleli qembu futhi izinto zimhambela kahle. Okuwubufakazi bokuthi konke kuhamba kahle ukuthi ngesizini edlule unqobe izinkomishi ezintathu kuPremier Soccer League (PSL), iTelkom Knockout, i-Absa Premiership neNedbank Cup.
UMosimane ukhonjwa ekuyoqeqesheni iqembu lase-Egypt i-Al Ahly, kuthiwa uzohamba noRhulani Mokoena abesizana naye kuSundowns noRangoaga osebenza ekuzivocavoceni kwabadlali.
