Kuboshwe abasolwa ngokweba imfuyo
Libashonele abasolwa ngokweba imfuyo ezindaweni ezakhele iZululand, uMzinyathi neMajuba.
Laba basolwa abaneminyaka ephakathi kwengama-30 nengama-53 babanjwe nezinkomo ezingama-35 okuthiwa bebezebile.
Kulezi zifunda sekube nesikhathi eside kubikwa ngenkinga yokwebiwa kwemfuyo kusuka ezinkomeni zeSILO kuya kwezemiphakathi eyahlukene okuyizakhamuzi nabalimi.
Kwezinye izigameko amaphoyisa asinda ngokulambisa olakeni lwalabo abasuke sebebanjwe nemfuyo yokwebiwa.
Kwezinye izigameko kuthiwa kuze kungenelele inhlangano isikebhe elwa nokwebiwa kwemfuyo.
UKhomishana Wamaphoyisa KwaZulu-Natal, uLt General uKhombinkosi Jula, uthe ukuboshwa kwalaba kube umsebenzi onzima obuhlanganisa amaphoyisa ezifunda ezahlukene ebezithinteka.
“Umkhankaso owenziwe Amajuba, iZululand noMzinyathi yiwo oholele ekutheni kuboshwe laba ababili kwabanjwa nezinkomo zokwebiwa ezingama-35. Umsolwa wokuqala oneminyaka engama-30 yena uthinteka emacaleni enzeke ngoNcwaba wezi-2020 zili-19, lapho okwaba nesigameko sokwebiwa kwemfuyo epulazini eliseVryheid. Ngesikhathi kuqhubeka uphenyo zili-11 izinkomo ezitholakele kodwa umkhondo ugcine usuyofika eKingsley lapho okwebiwa khona izinkomo ngowezi-2018,” kuchaza uJula.
Uqhube wathi kuthe uma kufikwa eKingsley kwaboshwa umsolwa oneminyaka engama-53 yena obanjwe nezinkomo ezingama-24.
“Lezi zinkomo ezingama-24 ezitholakele eKingsley zebiwe emapulazini ayisithupha mhla zili-10 kuZibandlela wezi-2018. Abasolwa laba ababoshiwe babekwe amacala okweba imfuyo base bevela namhlanje ngoMsombuluko enkantolo yase-Utrecht. Bagcinwe esitokisini kanti bayoze babuyele enkantolo mhla zili-15 kuMandulo wezi-2020,” kusho uJula.
Uthe umsolwa oneminyaka engama-30 uzodluliselwa eVryheid kodwa lona omdala uzogcinwa e-Utrecht ukuze mhla zili-15 kuMandulo afake isicelo sebheyili.
UJula uwashayele ihlombe amaphoyisa ngalo msebenzi wokubopha abasolwa aphinde athole nalezi zinkomo.
Uthe le mikhankaso eqhubekayo yokulwa nokwebiwa kwemfuyo izolekelela ukuphuthumisa amacala okweba nokubuyisa ithemba kubanikazi bemfuyo. Iningi labanikazi bemfuyo ezindaweni ezisemakhaya ligcina lishaywa izifo ezihambisana nenhliziyo ngenxa yokulahlekelwa imfuyo njengoba iyigugu nomnotho kubo.