ENaturena noma eChloorkop: Indebe yokugcina ye-Absa
Liyothi lishona elakusasa kuyobe sekwaziwa ukuthi yilona liphi qembu elidle umhlanganiso kuPremier Soccer League
Abaxhasi i-Absa okuyiyo exhase iligi enkulu kuleli okwenza ibizwe nge-Absa Premiership fuze akubuzwa ukuthi bayaziqhenya ngendlela bezovalelisa ngayo ekubeni abaxhasi.
Ukusebenzisana kweminyaka eli-13 phakathi kwe-Absa nePremier Soccer League (PSL) kuphelile okusho ukuthi iligi ngesizini ezayo izobe isibizwa ngelinye igama.
Okwenza baziqhenye ngendlela abazovalelisa ngayo ekubeni abaxhasi ukuthi akwaziwa ukuthi iliphi iqembu elizoba ngompetha bale ligi ezobizwa kokugcina nge-Absa Premiership.
Amaqembu asembangweni weligi mabili, iKaizer Chiefs neMamelodi Sundowns. IChiefs isesicongweni ngamaphuzu angama-56 kanti nayo iSundowns ehlezi endaweni yesibili kulogi inamaphuzu alinganayo, umehluko ohlukanise la maqembu amagoli amane nje vo.
La maqembu abedlala ngoLwesithathu kusihlwa iChiefs ibibhekene neChippa United yanqoba ngegoli elilodwa eqandeni, iSundowns yona yazigwazela ibhece kuPolokwane City iyibhubhisa ngamagoli amathathu eqandeni.
IChiefs eqeqeshwa u-Ernst “Mazinyo” Middendorp uma inganqoba umdlalo wayo wokugcina ozoba kusasa ibhekene neBaroka FC elele endaweni yesibili emsileni, kobe kusho ukuthi indlala yeminyaka emihlanu inganqobi nkomishi iyobe isiwumlando.
Umlando weBaroka FC neChiefs uyaziwa ukuthi eqala ukubhekana la maqembu ayedlala kumqhudelwano weNedbank Cup, iBakgakga yamangaza abaningi njengoba yayidlala kuVodacom League esiyaziwa nge-ABC Motsepe League kodwa iyona eyanqoba lowo mdlalo. Kungenzeka nakulokhu ifune ukuzifaka emlandweni ngokuphuca Amakhosi iqatha ngosuku lokugcina. Nayo izobe idlalela ukufa nokuphila njengoba ingekho endaweni enhle.
ISundowns eqeqeshwa uPitso “Jingles” Mosimane izobe imincele izinto ezimbili, okokuqala ukuthi iChiefs ihlulwe iBaroka FC yona bese iyanqoba emdlalweni wayo neBlack Leopards, okwesibili ukuthi uma enqoba Amakhosi anqobe okungenani ngegoli elilodwa yona bese ishaya amahlanu. AmaBrazillians yize ezimfivilithi kodwa kuzomele agawule abheke ngoba iLeopards ingavele iphakame ngayo ngoba nayo isengcupheni yokuyodlala amaplay-off.
ILeopards imangaze abaningi ihlula iBidvest Wits ngegoli elilodwa eqandeni ngoLwesithathu, elivalelwe phakathi uMwambe Musonda.
Uma kungagcina ngokuthi iSundowns kube iyona eba ngompetha, uMosimane uzobe esezifake emabhukwini omlando ngokunqoba lesi sicoco kahlanu. UJingles usesinqobe kane lesi sicoco, abanye abaqeqeshi abalingana naye uGordon Igesund, uTed Dimitru noGavin Hunt.
Okunye ukuthi iSundowns uma inqoba lesi sicoco izozifaka emathubeni okunqoba izicoco ezintathu kule sizini. Kuyimanje esandleni ineTelkom Knockout eyahlula kuyona iMaritzburg United kanti ngoLwesibili izodlala umdlalo wamanqamu weNedbank Cup neBloemfontein Celtic.
Umbango ozobe ubhekiwe futhi ukuthi imaphi amaqembu azoba sendaweni yesithathu neyesine, lawo maqembu ngokujwayelekile azothola ithuba lokudlala iConfederation Cup okuwumqhudelwano ongaphansi kweCAF Champions League. Amaqembu asembangweni iSuperSport United esendaweni yesithathu ngamaphuzu angama-50, i-Orlando Pirates enamaphuzu angama-49 endaweni yesine kube iBidvest Wits nayo enamaphuzu angama-49 endaweni yesihlanu.
Omunye umbango obhekiwe ilo wamaqembu afuna ukubalwa nayisi-8 aphezulu, ukuba lapho kunikeza lelo qembu ithuba lokudlala umqhudelwano womkhumulajezi iMTN 8. Amaqembu azolwela ukufa nokuphila efuna ukunyukela phezulu iCeltic esendaweni yesi-9 ngamaphuzu angama-36 neStellenboch nayo enamaphuzu angama-36 endaweni ye-10. Iqembu okuyilo elisendaweni yesi-8 iHighlands Park enamaphuzu angama-38 uma ingaqhuzuka kobe kusho okunye kuyona.
Iqiniso lithi ungayibala yonke imibango kuligi enhla maphakathi kodwa umbango onzima kakhulu usezansi lapho khona amaqembu efuna ukungagencwa izembe. Amaqembu asezansi kubalwa iPolokwane City eyivale emsileni okubukeka ivuthiwe indlela yayo eya kuGladAfrica Championship njengoba inamaphuzu angama-25, iBaroka FC nayo ayihlezi kahle njengoba inamaphuzu angama-28. Amanye amaqembu AmaZulu FC neLeaopards abanamaphuzu alinganayo angama-29.
Ngaphandle kwamaqembu ikhona eminye imibango yabadlali ngabodwana, lapho kubalwa unozinti ongangenelwanga amagoli emidlalweni eminingi, umdlali oshaye amagoli amaningi nomdlali owenze kahle kule sizini.
Konozinti uRonwen Williams ovimbela iSuperSport United emdlalweni eli-13 alikho igoli elimungenele futhi uyena ovimbe imidlalo eminingi njengoba engunombolo-1 eqenjini lakhe. Abamlandela ngemumva uRichard Ofori weMaritzburg United noWayne Sandilands wePirates labo nozinti alikho igoli elibangenele emidlaweni eli-11.
Abasembangweni wabahamba phambili ngamagoli uGabadinho Mhango wePirates, uPeter Shalulile weHighlands Park noBradley Grobler weSuperSport United bonke laba badlali banamagoli ali-15, balandelwa uSamir Nurkovic weChiefs onali-13 kanye noKermit Erasmus weCape Town City onali-12.
Emva kwale midlalo ezokuba kusasa amehlo azobe esebheke emdlalweni wamanqamu eNedbank Cup.
Isiyonke imidlalo yokusonga isizini yangowezi- 2019/2020 ye-Absa Premiership ihlelwe kanje
Ngomgqibelo
- iBloemfontein Celtic neMaritzburg United e-ABSA Tuks Stadium.
- iBidvest Wits nePolokwane City eFNB Stadium.
- iChippa United neLamontville Golden Arrows e-Orlando Stadium.
- iBaroka FC neKaizer Chiefs eBidvest Stadium.
- i-Orlando Pirates neStellenbosch e-Emirates Airline Park.
- iMamelodi Sundowns neBlack Leopards eDobsonville Stadium.
- AmaZulu FC neHighlands Park eLucas Moripe Stadium.
* Yonke le midlalo izoqala ligamenxe elesithathu ntambama.
