Zithe zephuka basebelophisile abakuleli kwiNetball World Cup
ZITHOLE ilungelo lokuzigqaja izintokazi zakuleli iSpar Proteas kwiNdebe yoMhlaba emveni kokudlala kahle. Izintokazi zakuleli ziqale umqhudelwano kahle kakhulu, zaqeda zingahlulwanga ngisho nakowodwa emidlalweni yamaqoqo. Zihlule iTrinidad & Tobago emdlalweni wokuqala ngamaphuzu angama-76 kwangama-45. Emdlalweni wesibili zizidlele amahlanga zihlula iFiji ngamaphuzu angama-90 kwangama-35. Emdlalweni wesithathu zamangaza abaningi zihlula iJamaica ekleliswe endaweni yesibili emhlabeni ngamaphuzu ama-55 kwangama-52.
Esigabeni esilandelayo iSpar Proteas sinqobe imidlalo emibili sahlulwa kowodwa, saqala ngokuhlula iScotland ngamaphuzu angama-68 kwangama-38, saphinde sahlula omkhaya i-Uganda ngamaphuzu angama-67 kwangama-40. Siye emdlalweni wokugcina wesigaba sesivele sidlulele esigabeni semidlalo eyandulela owamanqamu. Kulowo mdlalo sihlulwe yi-England ngamaphuzu angama-58 kwangama-47.
Emdlalweni owandulela amanqamu iSpar Proteas sidlale ne-Australia ekleliswe endaweni yokuqala emhlabeni emdlalweni obunzima kakhulu ogcine wehlukaniswa ngamaphuzu amabili ngenkathi i-Australia inqoba ngamaphuzu angama-55 kwangama-53. Lokhu kuchaze ukuthi elakuleli sekufanele liyodlalela indawo yesithathu ne-England okuyiyona ebisingethe lo mqhudelwano lapho ngeshwa lihlulwe ngamaphuzu angama-52 kwangama-48.
INdebe Yomhlaba igcine inqotshwa yiNew Zealand ihlula i-Australia ngamaphuzu angama-52 kwangama-51. Umqeqeshi weqembu lakuleli iSpar Proteas olishiyayo leli qembu uNorma Plummer uthe, “Ngiyaziqhenya ngendlela esidlale ngayo njengeqembu. Ngiyacabanga ukuthi senze kahle kakhulu kulo mqhudelwano. Ukuqeda endaweni yesine akusiyona into ongayithatha kancane. Ngiyabatshela abadlali ukuthi abazigqaje ngabakwenzile njengoba benze obekungalindelwe muntu, baqopha umlando.”
Eziqhamuka kamuva ekhempini yeSpar Proteas ezokuthi njengoba umqeqeshi elishiya iqembu ephindela kwelakubo lendabuko e-Australia abaphathi beNetball eNingizimu Afrika sebethathe isinqumo sokuthi isikhala sikaNorma Plummer sivalwe wumqeqeshi wokudabuka kuleli. Nokho yize sekuthathwe lesi sinqumo iziphathimandla zilincoma kakhulu igalelo likaNorma othathe iSpar Proteas wayibeka endaweni ehloniphekile yamaqembu amane aphezulu emhlabeni yize iqembu lihlulekile ukubuya nendondo.
