Kuqopheke umlando kowe-Australian Open
Umqhudelwano wanonyaka uqhamuke nokungalindelekile kuphetshezwa ezinye izethenjwa kulo mdlalo
UMLANDO uvuna uSerena Jameka Williams (35) ekukhaleni amuke nenkomishi ye-2017 Women’s Singles Australian Open azoyibanga nodadewabo omdala uVenus (36) emdlalweni wamanqamu ozoba ngoMgqibelo eMelbourne Park kulona leliya lizwe.
Lezi ntokazi zase-United States of America (USA) ezaziqeqeshwa nguyise uRichard Williams ziphinde zazifaka emabhukwini omlando womphebezo ngesikhathi zinqoba zombili emidlalweni yamasemi-final izolo ngoLwesine. Nokho sezaba nabaqeqeshi bazo, uyise wavele wanyamalala, akangabonakala uma zidlala.
USerena okleliswe endaweni yokuqala ezilinganisweni zeWomen’s Tennis Associations (WTA), kowandulela owamanqamu wehlule uMarjana Lucic-Baroni waseGermany okleliswe endaweni yama-79 ngamaphuzu ayi-6-2,6-1 kwase kuthi uVenus okleliswe kweye-13 wanqoba kukubi kumkhaya wakhe uCoco Vandeweghe ngayisi-6-7, (3) 6-2, 6-3. UVandeweghe usendaweni yama-35.
Emidlalweni yamaquarter final, uSerena ushaye uJohann Konta waseGBR okleliswe kweyesi-9 ngayisi-6-2,6-3. UVenus yena wedlule ku-Antasia Pavlyuchenkova waseRussia okweyama-27 ngayisi-6-4,7-6, 6-3.
Umlando ngalezi zintokazi emiqhudelwaneni yamaGrand Slam (Australian Open, iFrench Open, iWimbledon Championships ne-US Open) ikhomba ukuthi sezitholane phezulu amahlandla ali-14 kwase kuthi emidlalweni yamanqamu kwaba kayisi-8. Kule midlalo uSerena unqobe eyisi-8 kwathi uVenus wanqoba emibili.
UVenus unqobe kowamanqamu we-US Open ngowezi-2001 ngamaphuzu ayisi-6-2, 6-4 waphinde wamehlula kuWembledon ngowezi-2008 ngayisi-7-5, 6-4. USerena ku-Australian Open unqobe ngowezi-2003 ngayisi-7-6, 7-4, 3-6 kwathi kuFrench Open ngowezi-2002 wedlula ngayisi-7-5, 6-3. KuWimbledon uSerena ushaye udadewabo amahlandla amathathu. Kule ndebe ngowezi-2002 unqobe ngamaphuzu ayisi-7-6, 7-4, 6-3 kwathi ngowezi-20013 kwaba ngu-4-6, 6-4, 6-2. Kwathi ngowezi-2009 wanqoba ngayisi-7-6, 7-3, 6-2. Ku-US Open ushaye uVenus ngowezi-2002 ngayisi-6-4, 6-3.
Okuqaphelekayo lapha ukuthi ngesikhathi uSerena eqala ukunqoba i-Australian Open, iFrench Open neWimbledon Open wayedlala nodadewabo, uVenesa.
Uma sibuyela ku-Australian Open, uSerena usekwaze ukuyinqoba amahlandla ayisi-6. Abanye abashayile kulo mqhudelwano kube ngoLindsay Davenport wase-USA ngowezi-2005, uMaria Sharapova waseRussia ngowezi-2007, uDinara Safina wakhona eRussia ngowezi-2009, uJustine Henin waseBelgium ngowezi-2010 noSharapova ngowezi-2015.
IFrench Open uyinqobe kathathu eshaya uSharapova ngowezi-2013, noLucie Safarova waseRussia ngowezi-2015.
IWimbledon yona uyinqobe amahlandla ayisi-7 ngenkathi ethela othulini uVera Zvonareva wakhona eRussia ngowezi-2010, u-Agnieszka Radwanska wasePoland ngowezi-2012, uGarbine Muguruza waseSpain ngowezi-2015 no-Angelique Kerber nyakenye.
I-US Open uyinqobe amahlandla ayisihlanu eshaya uMartina Hingis waseSwitzerland ngowe-1999, uJelena Jankovic waseSerbia ngowezi-2008, uVictoria Azarenka waseBelarus ngowezi-2012 noCaroline Wozniacki waseDenmark ngowezi-2014.
Ngonyaka wezi-2015 kwakufanele aqophe umlando uSerena ngokuba ayinqoba yonke imiqhudelwano kodwa washoda nge-US Open kuphela.
Ngakolunye uhlangothi uVenus akakaze ayinuke i-Australian Open, kanjalo neFrench Open. Usakwaze ukuphakamisa inkomishi yeWembledon amahlandla amahlanu. Ngowezi-2000 ushaye uDavenport, uJustine Hennin waseBelgium ngowezi-2001, umphindile iDavenport ngowezi-2005. Ngowezi-2007 ushaye uMario Bartoli waseFrance wase evala ngodadewabo. I-US Open uyinqobe kabili eshaya uDavenport ngowezi-2000 wabe esevala ngodadewabo ngowezi-2001.
Okuqaphelekile kulo mqhudelwano walo nyaka ukuthi uVenus ubelenyuse kakhulu izinga lokudlala uma kuqhathaniswa nodadewabo uSerena.
Izingqapheli zalo mdlalo seziqagule ukuthi mhlawumbe kungaphinde kwenzeke okwangowezi-2001 nokwangowezi-2008 lapho uVenus ehlula khona uSerena kuWimbledon naku-US Open.
Nakuba uma lezi zintokazi zakwaWilliams zingathandi ukukhuluma uma zizotholana kowamanqamu kodwa kubukeka uVenus ezolwa kuze kunqamuke iracquet kwazise akakaze ayinuke i-Australian Open.
Ngesikhathi uSerena etholene phezulu noLucic-Baroni ubonakale ezwela izinhlungu ethangeni lesokunxele. Kusatshelwa ekutheni lokhu kungamphazamisa kusasa ngoMgqibelo.
Ebuzwa ngokudlala noVenus kowamanqamu ushaye ngamafuphi wathi: ”Ngiyambongela udadewethu, uyikhona konke kimi. Engikujabulelayo ukuthi owamanqamu sizowudlala sobabili”.
Ngaphandle kwezintokazi, omunye umdlalo obhekiwe ngowamanqamu weMen’s Singles Australian Open okulindeleke ukuthi uRoger Federer waseSwitzerland awudlale nozonqoba phakathi kukaRafael Nadal noGrigor Dimitrov waseBulgaria abazotholana kowamasemi final namuhla ngoLwesihlanu ekuseni.
Phela izolo ngoLwesine, uFederer okleliswe endaweni ye-17 ezilinganisweni zeMen’s Professional Tennis ushaye umkhaya wakhe uStanislas Wawrinka ngamaphuzu ayisi-7-5, 6-3, 1-6, 4-6, 6-3. UWawrinka ukleliswe endaweni yesine.
Zozine lezi zinsizwa zifika kowandulela owamanqamu nje, abebebhekwe kakhulu u-Andy Murray okleliswe endaweni yokuqala ukhishwe kabuhlungu uMischa Zverev waseGermany maphakathi ne-Australian Open. Okwethuse kakhulu ukuthi uZverev usendaweni yama-50 ezilinganisweni. Umfowabo kaZverev,u-Alexander yena ukhishwe uNadal emzuliswaneni wesithathu kulo mqhudelwano.
Okunye obekungalindelekile ku-Australian Open kube ukushesha ukuphuma kompetha banyakenye, uNavak Djokovic waseSerbia nentokazi u-Angelique Kerber waseGermany.
UDjokovic okleliswe endaweni yesibili ukhishwe iwildcard u-Istomin wase-Uzbekistan emzuliswaneni wesibili.
U-Istomin usendaweni ye-117. UKerber ophinde abe sendaweni yokuqala ukhishwe uVandeweghe emzuliswaneni we-3.
Uma sibuyela odabeni lukaFederer unqoba lapha nje, ubesehlale isikhathi esicela ezinyangeni eziyisithupha engadlali ngenxa yokulimala. Uma ekwazile ukunqoba ngeSonto kuzobe kungokokuqala ephakamisa eye-Australian Open.
