Kulindelwe lukhulu kwabathezwe amaqembu
Amaqembu amakhulu afaka abaqeqeshi nabadlali abasha ingcindezi
AKUBUZWA ukuthi abalandeli bakanobhutshuzwayo baseNingizimu Afrika nabaseSpain sebelangazelele kabi ukuqala koshikishiki lwemidlalo yesizini entsha yowezi-2016/17. Ngaleso sikhathi abathandi balo mdlalo e-England sebeqalile ukukhonjiswa izintandokazi zamaqembu zabo ukuthi bazohamba ibanga elingakanani.
Isizini entsha ye-English Premier League (EPL) ivune izinkunzi zabaqeqeshi uJose Mourinho noPep Guardiola abaqale imisebenzi yabo emaqenjini amasha ngokunqoba. UMourinho, olandwe yiManchester United ngemuva kokulaxazwa yiChelsea maphakathi nesizini edlule, uvule ngokunqoba ngama-3 kwelilodwa kudlulwa kuBournemouth kwathi
ngakolunye uhlangothi uGuardiola, oqalayo ukusebenza e-England, naye uqale ngezinga eliphezulu ehola iManchester City idlula ngamabili kwelilodwa kuSunderland. Bekubhekwe ngelokhozi ukuthi laba baqeqeshi baqala kanjani. Phela banamlando wokuqoqa izindebe eziningi emaqenjini ahlukene.
Inkulu nengcindezi ababhekene nayo kwazise la maqembu abo amasha awenzanga kahle ngesizini edlule. Njengoba iMan United itheze abadlali abanohlonze abanjengoZlatan Ibrahimovic waseSweden nesihlabani saseFrance uPaul Pogba, ilindeleke ukuthi iyiqede indlala yezindebe.
Akubuzwa ukuthi uMourinho ufuna ukuvikela isithunzi sakhe sokungahlulwa kalula njengoba edume ngokuthi unguSpecial One kwazise lapho aqashwa khona unqoba izicoco. Emdlalweni wokuqala e-Old Trafford uMourinho uzobe ebheke ukunqoba sekudlalwa neSouthampton kusihlwa ngelesi-9.
UGuardiola naye ubhekwe ngabomvu ukuthi uzolunga yini e-England kwazise zimvumile izinto eSpain naseGermany. Ngesikhathi eqeqesha iBarcelona unqobe izindebe zeLigi, iLa Liga, amahlandla amathathu wase eyivala ngezindebe ezimbili ze-Uefa Champions League.
Udlulele eGermany lapho enze khona iBayern Munich ompetha beBundesliga kathathu wase enezezela ngeFifa Club World Cup. Lo mqeqeshi waseSpain ufike wakhombisa ukuthi uyiqala phansi ngempela iMan City ngesikhathi bedla iSunderland. Udlalise ngohlaka olumi kanje: 4-1-4-1 olubuye lume kanje: 3-2-4-1 uma ezakhe zihlasela. Okunye okugqamile akwenzile ukweqisa ngejezi unozinti uJoe Hart. IMan City izovakashela iStoke City eBritannia Stadium seligamenxe elokuqala ihora.
Ebholeni laseSpain amehlo abheke ukuthi iReal Madrid ikuqeda kanjani ukuzichanasela kweBarcelona esinqobe iLa Liga amasizini amathathu kulandelana. Ngesikhathi lapho iBarca ne-Atletico Madrid bephansi phezulu beqinisa amabhawodi, iReal Madrid yona isamemezele ukuthi ifuna ukubuyisa u-Alvaro Morata obekuJuventus iminyaka emibili.
Lo mgadli waseSpain, noshaye amagoli amathathu ku-UERO 2016, uzobanga indawo yokudlala noKarim Benzema othandwa uZinedine Zidane. Ezinye izindawo zaphambili ngezikaChristiano Ronaldo dos Santos noGareth Bale. Leli qembu eliholwa uZidane lizoqala isizini livunwa izinto eziningi. Abadlali bakhe badlale kahle ku-EURO kade bemele amazwe abo.
URonaldo noPepe basePortugal babe nesandla ekunqobeni umqhudelwano. UGareth Bale yena wayevutha engabaselwe wafaka iWales kumasemi final. ULuka Modric ubengukhiye kuCroatia kanti uToni Kroos washaya into ecokeme esiswini seGermany waze waqokelwa eqenjini elidlale kahle emqhudelwaneni.
Okuzobhekwa kuZidane wukuthi uzosebenzisa ubuchule obunjani ukuze ezakhe zibambe umgqigqo eziqede ngawo njengoba zizumeke nendebe ye-UEFA Champions League. Ngakolunye uhlangothi umqeqeshi weBarcelona u-Enrique uthe akakaqedi ukusayinisa njengoba eselande u-Andre Gomes, uSamuel Umtiti, uLucas Digne noDenis Suarez.
IBarcelona izoqala isizini ihambela phezulu nakhu kuthangi inqobe iSuper Cup ngokwehlula iSevilla ngama-5 eqandeni uma sekuhlanganiswa imiphumela yemidlalo emibili abayigijimile. U-Arda Turan uqobele enethini amagoli amabili kwathi uLionel Messi washayela isipikili sokugcina kulo mdlalo obuseNou Camp. U-Enrique akakufihlanga ukuthi usabheke ukuvikela indebe yabo.
IBarca izovula isizini neReal Betis ngoMgqibelo engekho uJavier Maschenaro odonseke umsipha onyaweni lwesokudla ngesiwombe sesibili. Lapha eNingizimu Afrika kubhekwe ukuthi abadlali abasha bazowenzelani amaqembu abo amasha. Umdlali ozobhekwa kakhulu nguSibusiso “Villa” Vilakazi olandwe ompetha bangesizini edlule iMamelodi Sundowns ngezishaqane zemali.
Okubhekwe kakhulu kuVilakazi, odlala esiswini futhi onekhono lokuhlohla amagoli, wukuthi uzongena nini esitayeleni sabafana bakaPitso Mosimane kwazise sekuphele amasizini amabili ehlelwa ifomu egijima kuBidvest Wits. Kungena igama leWits nje, umqeqeshi wayo uGavin Hunt unengcindezi yokunqobela leli qembu laseMilpark indebe njengoba isimhlule amasizini amathathu.
Kakade walandwa kuSuperSport United ukuzofaka izindebe ekhabetheni leWits kwazise wenzela iSuperSport lo msebenzi oncomekayo ngokunqoba izindebe zeLigi ngesizini yowezi-2008, yowezi-2009 nowezi-2010. Hleze ukuthola kwakhe abagadli abanjengoMogakolodi Ngele noCuthbert Malajila abavela kuSundowns kuzoyixazulula indlala.
Akuyena uHunt yedwa onengcindezi yokunqoba indebe. UStuart Baxter ozakhele ugazi enqobela iKaizer Chiefs izindebe ezintathu, unomthwalo wokujabulisa abaphathi ngokuhlwitha indebe yeLigi kuSundowns. Lo mqeqeshi ophiwe ngobuchule uthengelwe abadlali beqophelo eliphezulu. Laba ngoReneilwe “Yeye” Letsholonyane nonozinti uReyaard Pieterse asebenze nabo kahle kuChiefs.
Umqeqeshi omusha wePirates uMuhsin Ertugral kufuze ukuthi uyakuqonda ukuthi ukungenzi kahle kwezakhe zisuka nje, kuzomdalela ingcindezi engenasidingo. U-Ertugral uthengelwe bonke abadlali athe uyabadinga okubalwa kubo u-Abbubaker Mobara. Imidlalo yokuqala yePSL ihlelelwe uLwesibili.