Ukwenza kahle kwePirates e-Afrika kunikeza uMashaba ithemba



UMaphumulo uyintatheli yezemidlalo.
U-EPHRAIM “Shakes” Mashaba uthemba ukuthi ukwenza kahle kwe-Orlando Pirates kuCaf Confederation Cup kuzophinde kubuyise ukuzethemba kuBafana Bafana.
NGESONTO eledlule emcimbini obuseSt Petersburg, eRussia, wokuqhatha amakilabhu emidlalweni yokuhlungela iFIFA World Cup, iBafana itonyulwe ukuba ibhekane ne-Angola. Ngenxa yendawo lawa makilabhu akleliswe kuyona kawazodlala emzuliswaneni wokuqala wemidlalo yokuhlunga eqala ngoMfumfu. Ngokokukleliswa kuConfederation of African Football (CAF) iBafana isendaweni ye-16 bese kuthi i-Angola ibe kweyama-24.
Umlenze wokuqala walawa maqembu wokuhlungela iFIFA World Cup uzoba mhla zili-11 kuLwezi eLuanda, e-Angola. Owesibili uzoba kuleli ngasekupheleni kwayo inyanga kaMfumfu enkundleni engakamenyezelwa. Leli yithuba leqembu lesizwe lakuleli lokudlala ihlandla lesine emidlalweni YeNdebe yoMhlaba njengoba likwazile ukuba yingxenye yayo ngowe-1998, ngowezi-2002 nangowezi-2010 imidlalo isingethwe kuleli. Izindaba ezimnandi ngezithi emidlalweni eyisi-8 iBafana eyidlale namaPalancas Negras okuyigama okuteketiswa ngalo i-Angola inqobe emihlanu okuhlanganisa nowesihle ebusezinyangeni ezidlule ewunqobe ngo-2-1. La maqembu asedlale amahlandla amathathu ngokulingana.
IBafana izodlala le midlalo nje, ivele ikweyokuhlungela i-Africa Cup of Nations (AFCON) ezoba ngowezi-2017 eGabon. KuGroup M ezikaMashaba ziqhathwe neMauritania ezodlala nayo mhla zi-5 kuMandulo ekuhambeni e-Olympic Stadium, eNouakchott. Amanye amaqembu elakuleli eliboshelwe nawo yiGambia neCameroon.
UMashaba uthi ukudlala kahle kwe-Orlando Pirates kuCAF Confederation Cup kumnika ithemba lokuthi umlando ungaziphinda ebholeni lakuleli. KuBucs abadlali abagqamile kuBafana nguThabo Matlaba no-Oupa Manyisa. UMashaba uthi ukwenza kahle kwePirates kungaba nomthelela omuhle emidlalweni yokuhlungela iNdebe yoMhlaba ne-Afcon. Ngeledlule iBucs ishaye i-AC Sfaxein ngo-1-0 emdlalweni obesekuhambeni eTunisia.
“Uzokhumbula ukuthi ngowe-1995 iPirates yanqoba iCAF Champions League. Ukuzethemba kwabadlali ababegijima kuyona kwenza omkhulu umsebenzi ngonyaka olandelayo njengoba iBafana ngaphansi kukaClive Barker owayeyicija yanqoba I-AFCON. Nakulokhu kuzomele sisisebenzise kakhulu isipiliyoni sabadlali beBucs ukunqoba le midlalo yokuhlunga. Nakuba kungadingeki ukuthi siyifakele ingcindezi iPirates kodwa asemaningi amathuba okuthi ingene emdlalweni owandulela owamanqamu,” kubeka uMashaba.
Lo mqeqeshi uthi okubalulekile manje wukuqhamuka nesu lokuthi elakuleli lifinyelela kanjani emidlalweni yeNdebe yoMhlaba, liyeke ukukhononda ngokuthi libe neshwa lokuqhathwa neqembu elinzima njenge-Angola. Ucele izakhamuzi zakuleli ukuthi zingawuyekeli kubona umsebenzi wokufinyelela kule miqhudelwano yomhlaba. Uthi kanjalo namakilabhu akuleli adinga ukwesekelwa ngayo yonke indlela ngoba sekuyisikhathi sokuthi ayinqobe imiqhudelwano efana neCAF Champions League.
“IPirates ikwazile ikushaya iCS Sfaxein esikwaze ukunqoba iCAF Condederation Cup amahlandla amathathu. Isikwazile ukubuyisa izinduku ku-AC Leopards eyabhaxabula iBucs koweCAF Champions League. Yini okungayehlula manje?” kubuza uMashaba. Lo mqeqeshi obehambele umcimbi wokwamukelwa kwamakilabhu aphuma e-Europe ayingxenye yeDurban KwaZulu-Natal U/19 International Football Tournament eqhubeka ezinkundleni ezahlukene eThekwini uthi uhlobo lwemidlalo efana nalena kufuneka lwande. Uthi ulubona lungaba yisixazululo enkingeni yokungenzi kahle ebhekene namaqembu akuleli. Amakilabhu ayingxenye yale midlalo yiPSV Eindhoven yaseNetherlands, i-AC Milan yase-Italy, i-Arsenal FC yase-England, iCeltic FC yaseScotland, iVfB Stuttgart yaseGermany neGalatasaray yaseTurkey. INingizimu Afrika kule midlalo imelwe yiKZN Academy XI neNational U/19 Team. Le midlalo iqale ngoLwesithathu. Izinkundla ezizosetshenziswa lapha iKing Zwelithini Stadium, eMlazi, iSugar Ray Xulu Stadium eseClermont, iPrincess Magogo Stadium eKwaMashu okuzodlalelwa kuyona umdlalo owandulela owamanqamu neMoses Mabhida Stadium ezosingatha owamanqamu.