UYAMEMEZA OKANDABA: UZulu kawuphelele eMashobeni

UMtaka ungumbhali wezindaba zamazwe neMeneja kwi-Igunundu Agency.

ISILO ngomlomo kaMntwana waseZibindini sesimemezele ukuba ngomhla zingama-29 kuMfumfu sibiza Wonke uZulu okuyizigodlo zeNgonyama, amakhanda ezindlu zobuKhosi bukaZulu, indlunkulu uqobo, amakhosi abheke umhlaba weSILO kanye nengubo yaSo kabaphelele esigodlweni eMashobeni.

IBhubesi limemeza nje kuzokhumbuleka ukuba ezinsukwini ezedlule inkantolo yokwedlulisa amacala ikhiphe isinqumo lapho ikubeke ngokusobala ukuthi osesihlalweni unguye onguye okuqede ukuthandabuza obekungase kubekhona.

Ngomlomo woMntwana uThulani ISILO inhloso yalokuhlangana sithe ukuzobikela isizwe kanye nabanikazi beSihlalo ngalo lonke uhambo lwezinkantolo njengoba seligoqiwe-nje. Khona lapho oMdala njengengwe ezikhotha amabala amhlophe namnyama ukuvezile ukuthi ngalokhu kuhlangana uzokwelula isandla soxolo nokubuyisana eNdlunkulu kanye neSizwe.