Abashushisi bacele iNkantolo yoMhlaba ukuthi igwebe abaholi bamasosha baseCentral African Republic
Abashushisi be-International Criminal Court bacele abehluleli ngoMsombuluko ukuthi athole amadoda amabili asolwa ngokuhola amasosha angamaKrestu ekuhlaseleni abahamba nenkolo yobuSulumane eCentral African Republic ngowezi-2013 nangowezi-2014 enamacala awo wonke amacala ababhekene nawo.
Eziphakamisweni zabo zokuvala, abashushisi bathe bakufakazele ngaphandle kokungabaza ukuthi uPatrice-Edouard Ngaissona kanye no-Alfred Yekatom basize ekuholeni umkhankaso wodlame olubhekiswe kubantu abangamaSulumane nokuthi labasolwa ababili banecala kuwo wonke amacala empi kanye nobugebengu obubhekiswe kubantu. . Bobabili abesilisa bawaphika amacala ekuqaleni kwecala labo ngowezi-2021.
Umshushisi uKweku Vanderpuye uyichithile imizamo yabasolwa yokubeka u-Ngaissona, owayeyisikhulu sebhola, njengomuntu owazama ukuqeda udlame. “UNgaissona ubengeyena umuntu wokuthula,” esho, wengeza ngokuthi lowo owayeyisikhulu sezemidlalo wayengumholi wesikhathi eside wamasosha amaningi angamaKrestu aziwa ngokuthi “i-anti-Balaka”.
UYekatom, oteketiswa ngelika-“Rambo”, wayephethe amalungu ezempi angaba yizi-3 000 futhi wayesatshwa ngisho nasezikhundleni zakhe, edubula ozakwabo abathathu ebasola ngokumbuka, kusho umshushisi.
Amasosha e-Anti-Balaka athatha izikhali ngowezi-2013 ngemuva kwezinyanga zokuphangwa nokubulawa iningi lamavukelambuso eSeleka ahamba nenkolo yobuSulumane athatha izintambo ngoMbasa ngawo lowo nyaka. I-ICC ibiphenya ngodlame eCentral African Republic kusukela ngoNhlaba wezi-2014. Kukhona elinye icala eliqhubekayo lomholi weSeleka. Ngenyanga edlule i-ICC yethule incwadi egunyaza ukuboshwa komunye umholi wamasosha angamaKristu.
