I-Beach Fest yeGagasi FM izobophela izinkakha ePeople’s Park ngoMgqibelo
Zilungiselele ukuba yingxenye yomgubho womculo oshisa izikhotha, njengoba iGagasi FM Beach Fest yenza ibuya kuloZibandlela. Kusukela ngehora le-10 ekuseni ngoMgqibelo, iMoses Mabhida – Peoples Park eThekwini izobe seyinyimfika kuze kuyolamula ukuhlwa, kubungazwa ukuhlabahlosa okunothile komculo waseThekwini nowaseNingizimu Afrika.
Njengoba ihlanganisa ishumi leminyaka lokushintshisana ngomculo, iGagasi FM Beach Fest isikhule yaba umcimbi ogubha ukunotha kwezokuzijabulisa. Kulo nyaka, ngaphansi kwendikimba ethi “Unyaka Wezinkakha (Year of the Goat),” lomcimbi ukhumbula iminyaka eli-11 yokugqugquzela ubumbano nokuzigqaja ngamasiko, ugqamisa umoya wempilonhle yeTheku.
Kulo nyaka, le festiveli izohanjelwa inqwaba yabaculi, okuhlanganisa nezihlabani eziseqophelweni eliphezulu, zihambisana nethalente laseNingizimu Afrika.
Okugqame kakhulu kwiGagasi FM Beach Fest ukulethwa kwabaculi abahlonishwayo bezizwe ezahlukene asebake bahlonishwa nangezindondo. Abahambele ifestival bangazitika ngezinto ezithokozisayo futhi bahlole ubuciko, imisebenzi yezandla, nendwangu kubathengisi abamele ubuciko obunothile besiko laseThekwini.
Kule minyaka eyishumi edlule, iGagasi FM Beach Fest ihlanganise amaciko anekhono elimangalisayo, ahlanganisa abaculi abadumile abafana no-AKA (ongasekho), Kabza Da Small, Blaq diamond, Nasty C, Nomfundo Moh, Tyler ICU, no-DJ Tira. Le festivali iphinde yahlonishwa ngabantu abaziwayo emphakathini okubalwa kubo uNgqongqoshe wezeMpilo KwaZulu-Natal – uNksz Nomagugu Simelane kanye nowayeyiMeya yeTheku, uMxolisi Kauda.
“Siyaziqhenya futhi siyakuthokozela ukumemezela izikhondlakhondla zemikhiqizo yeTelkom neMagnum njengabalingane abazigqaja ngezihloko zeGagasi FM Beach Fest yalo nyaka. Lokhu kubambisana kuzoba nomthelela omkhulu empumelelweni yomkhosi. Yonke imigwaqo isibheke eMoses Mabhida, ePeoples Park, njengoba umculo uwumgogodla weGagasi FM Beach Fest, kanti uhlelo lwalonyaka luzoba undabuzekwayo. Lungiselela ukudansa, ukucula, nokuhambisana nesigqi sezinhlobo ezahlukene zomculo ezizojabulisa isiteji,” kuphawula iGagasi FM engabali balefestivali.
Amathikithi aseyatholakala e-Webtickets nakunoma yiziphi izitolo zakwa-Pick n’ Pay ngama-R300 kanti awezicukuthwane wona ayi-R1000. Awekho ama-Passout( mase ungenile ungenile waphuma awube usakwazi ukubuyela) avunyelwe. Awekho amabhodlela azovunyelwa ngaphakathi.
