AmaKhomanisi azongenela ukhetho lohulumeni bendawo ngokuzimela

UMtaka ungumbhali wezindaba zamazwe neMeneja kwi-Igunundu Agency.

I-South African Communist Party (SACP) ithi isinqume ukungenela ukhetho loHulumeni Bezindawo lwangowezi-2026 (LGE) ngokuzimela ingabe ngaphansi kombimbi lwe-African National Congress (ANC).

Amakhomanisi athi zonke izindlela zokungenela lolukhetho ezimele zizodingidwa engqungqutheleni yawo yesi-5 eyisipesheli kaZwelonke esikhathini esingamaviki amabili azayo. Akukhona okokuqala ukuthi amakhomanisi angenele ukhetho ngokuzimela ngemuva kokufakwa ohlwini ilunga lawo kwabazongenela ukhetho kuMasipala waseMetsimaholo, eFree State.

Ekhuluma ekupheleni komhlangano wabo we-Central Committee, uNobhala-Jikelele uSolly Mapaila uthe izingxoxo zabo ezimbili ne-ANC ngoMasingana nazo zizolidingida lolu daba. “Besiyikhombisile i-ANC ukuthi sesithathe isinqumo sokungenela ukhetho lwasekhaya njenge-SACP. Ngakho, ngokusemthethweni manje lokhu sekudluliselwe ku-ANC.”