URamaphosa ukhala ngokudlula emhlabeni kukaMengameli wase-Iran uRaisi
UMengameli uCyril Ramaphosa udlulise ukudabuka okukhulu mayelana nenhlekelele edlule nemiphefumulo kaMengameli wase-Iran u-Ayatollah Ebrahim Raisi, uNgqongqoshe Wezangaphandle uHossein Amir-Abdollahian kanye nezisebenzi zakhona e-Iran.
UMengameli Raisi kanye noNgqongqoshe u-Amir-Abdollahian bashonei indiza enophephela emhlane iphahlazeka eMpumalanga Azerbaijan ngesikhathi abaholi besendleleni ebuyela e-Iran ngeSonto, 19 May 2024. Le ndiza iphahlazeke endaweni enezintaba namahlathi ezweni ngenxa yesimo sezulu esingesihle.
“Egameni likaHulumeni nabantu baseNingizimu Afrika, uMengameli uRamaphosa udlulisa amazwi enduduzo kuMholi Ophakeme wase-Iran, uGrand Ayatollah Sayyid Ali Khamenei, kanye nakuHulumeni nakubantu base-Islamic Republic,” kuqhuba ikhasi likaMengameli
Abaholi bamazwe ahlukene nabo sebedlulise amazwi enduduzo okubalwa kubo uNdunankulu wasePakistan uShehbaz Sharif, umholi wase-India uNarendra Modi, umholi waseTurkey, uRecep Tayyip Erdogan, uNgqongqoshe wezangaphandle e-Russia uSergei Lavrov kanye nomengameli weChina uXi Jinping.
Lo Mengameli obeseneminyaka engama-63 ubudala, ubemele amaqembu aphikisayo futhi aqinile kwezombusazwe wase-Iran, ubenguMengameli cishe iminyaka emithathu, futhi ubonakale esendleleni yokungenela ukhetho kabusha ngonyaka ozayo.
URaisi wenze izinkulumo eziningi kusukela kuqale impi yaseGaza ngoMfumfu wonyaka odlule ukugxeka ukubulawa kwabantu okwenziwe u-Israyeli ngokumelene namaPalestina, futhi wacela umphakathi wamazwe ngamazwe ukuba ungenelele.
Wathembisa ukuziphindiselela kwa-Israyeli ngemuva kokuthu u-Israeli wadiliza isakhiwo senxusa laseTehran eSyria futhi kwashona amalungu ayisikhombisa e-Islamic Revolutionary Guard Corps (IRGC), okuhlanganisa nojenene ababili.
Waphinda wabamba iqhaza elikhulu ekwethulweni kwamakhulukhulu amadroni nemicibisholo kwa-Israyeli, iningi lazo eladutshulwa umfelandawonye wabambisene bakwa-Israyeli kodwa yashiya i-Iran ithi impumelelo khona lokho.
IPhini likaMengameli uMohammad Mokhber uqokwe ukuthi athathe izintambo zesikhashana ngemuva kokushona kukaMengameli. UMnu Mokhber uzosebenzisana nezinhloko zeSishayamthetho nezinkantolo zase-Iran ukulungiselela ukhetho lukamengameli zingakapheli izinsuku ezingama-50 okuyisikhathi esibekwe kuMthethosisekelo wase-Iran sokuvala isikhala sikamengameli ofela esikhundleni.