UPandor ufuna i-ICC ikhiphe izigunyazo zokubopha izikhulu zakwa-Israeli
UNgqongqoshe weZobudlelwano Nokusebenzisana Kwamazwe uNaledi Pandor usenxuse iNkantolo Yamazwe Yamacala Obugebengu (ICC) ukuthi ikhiphe incwadi egunyaza ukuboshwa kwezikhulu zakwa-Israeli ezithinteka ekubulaweni kwezakhamizi ePalestine.
UPandor uthe i-ICC yashesha ukukhipha incwadi egunyaza ukuboshwa kwaMengameli waseRussia u-Vladimir Putin mayelana namacala ezimpi e-Ukraine kodwa ayisho lutho ngoNdunankulu wakwa-Israeli uBenjamin Netanyahu.
Ubethula inkulumo eNyuvesi yaseGoli yokuhlonipha intatheli yasePalestine eyabulawa, uShireen Abu Akleh. “Esikhumbuzweni sikaShireen Abu Akleh, sonke siyaqhubeka nokucela i-ICC ukuthi ishushise lawa macala ezimpi futhi ikhiphe nezincwadi ezigunyaza ukuboshwa kwalabo baholi kwa-Israel abayalele futhi bengamele la macala. Ukuhamba kancane kokuphenya nokushushisa labo abathintekayo kulawa macala empi kudinga ukugqugquzelwa okukhulu phakathi kwentsha nemiphakathi yomphakathi emhlabeni wonke ukuze kuqinisekiswe ukuthi ubulungiswa kubantu basePalestine buyenzeka.”
Ngaleso sikhathi, izinhlangano ze-UN nezinye izinhlangano ezizimele ziyaqhubeka nokuzwakalisa ukungaqiniseki ngokufinyelela kosizo eGaza, ngemuva kokuthi u-Israeli uvale izindawo ezimbili ezibalulekile zokungena. Izwe libukeka lilungiselela ukungena okulinganiselwe edolobheni eliseningizimu iRafah ngemuva kokuvimba zombili izindlela eziwela imingcele yaseKarem Shalom neRafah ekuqaleni kwaleli sonto.
Umbutho wezokuvikela wakwa-Israel uthe usuyivulile kabusha iKarem Shalom, eyivale ngempelasonto ngemuva kokuhlasela kwerokhethi yeHamas kwashona kwalimaza amasosha amaningi e-IDF. Ama-ejensi axwayisa ngokuthi ukuvalwa kwa-Israel iRafah kuzoba nomthelela omubi emisebenzini yokusiza abantu.
