Izihlabani zendawo ziphinde zasina zazibethela kumarathoni

Kuphinde kwagqama abasubathi bakhona eHarry Gwala District emjahweni wakhona waminyaka yonke iHarry Gwala District Marathon.

Lo mjaho ubuyizolo ngeSonto, lokhu okwenziwa ilaba basubathi bakulesi Sifunda akujwayelekile impela. Minyaka yonke amagama ahlukahlukene abasubathi ayavela kulabo abasuke benze kahle. 

Nonyaka lo mjaho ubugijinywa okwesi-9, ubusukela e-Ibisi Police Station eMzimkhulu waphelela e-Ixopo High School eXopo.

Umzila wakulo nyaka ubunzima kakhulu njengoba umjaho ubunyuka, kanti izintaba zakhona ziwumqansa omkhulu. 

UMholi Jali nguye odle umhlanganiso kwabesilisa ebangeni lika-42km ngesikhathi esiwu-02:33:45, uJenet Mbhele yena unqobe ebangeni lika-21km ngesikhathi esiwu-01:23:24. 

Lokhu kukhonya kwabasubathi bakhona kulesi sifunda kuqale ngonyaka wezi-2018, nalapho ebangeni lika-10km kwanqoba khona uJenet. 

Ngowezi-2018 uJenet waphinde wanqoba ebangeni lika-10km, uCacisile Sosibo waphuma endaweni yesithathu ebangeni elifanayo. UThobani Chagwe wadla umhlanganiso ebangeni lika-42km, uNdumiso Sokhela walala endaweni yesibili, uJali waphuma endaweni yesine. 

Ngowezi-2020 uJenet wanqoba owebanga lika-21km, kwathi uSokhela yena wanqoba ebangeni lik-42km. 

Ngenxa yokhuvethe lo mjaho awubanga khona ngowezi-2021 waze wabuya ngowezi-2022, nalapho ebangeni lika-21km uJenet walala endaweni yesine uMfundo Chagwe ebangeni elifanayo kwabesilisa waphuma kweyesithathu. USokhela walala endaweni yesibili ebangeni lika-42km. 

Ngowezi-2023 uJenet ubuyile wanqoba ebangeni lika-21km, ebangeni lika-10km u-Inganathi Ngubo oneminyaka yobudala eli-14 waphuma endaweni yesithathu u-Anele Ndawonde yena oneminyaka yobudala eli-15 waphuma kweyesithupha ebangeni elifanayo. 

USinethemba Tshangase waphuma endaweni yesibili ebangeni lika-42km, uJali yena waphuma kweyesi-7.