Ukusolana ngamasosha alimele eDRC
IDemocratic Republic of Congo (DRC) isole amasosha aseRwanda ngokuqala ukuhlasela ngezindiza endaweni yamasosha e-UN empumalanga yeDRC, kwalimala abantu abayisishiyagalombili. Kuqubuke izingxabano phakathi kwamasosha kaHulumeni namavukelambuso iM23 edolobheni elisempumalanga neDRC iSake ngempelasonto.
Iziphathimandla zaseCongo zithe amasosha ayisishiyagalombili e-UN alinyazwe amarokhethi adutshulwe endaweni yawo empumalanga yedolobha iSake. Omunye wabagcini bokuthula ulimale kanzima kulokhu kuhlasela. Wakhishwa endaweni enezingxabano futhi uthola ukwelashwa esikhungweni sezempilo.
La masosha alimele abe yingxenye noma ayingxenye yomkhankaso owaziwa ngokuthi yiSpringbok, owethulwe ngonyaka odlule ukuvikela izakhamuzi endaweni ekhungethwe izingxabano.
Umkhulumeli wamasosha eDRC usole amasosha aseRwanda, okubikwa ukuthi alwa ohlangothini lwamavukelambuso iM23 ngokwenza lokhu. Kodwa iRwanda ikuphikile lokhu. UNobhala Jikelele we-UN kanye nenhloko yethimba lezokugcina ukuthula eDRC bakugxekile lokhu kuhlasela bathi kungase kube ubugebengu bezempi ngaphansi komthetho wamazwe ngamazwe.
Ukulwa phakathi kwamasosha aseCongo namavukelambuso iM23 kuqubuke ngempelasonto ngemuva kokuthula isikhashana. Amavukelambuso iM23 athi alwela ukuvikela umphakathi wawo wohlanga lwamaTutsi empumalanga yeDRC emaqenjini ayizimbangi afana neFDLR eyakhiwe ngabohlanga lwamaHutu.
Le mpi isiphoqe amashumi ezinkulungwane zabantu ukuthi babaleke bashiye amakhaya bayobhaca edolobheni elisempumalanga iGoma kusukela kuqale lo nyaka. Umphakathi wamazwe omhlaba usucele ukuthi kumiswe ukulwa futhi kuxazululwe ngokuthula izingxabano, kodwa amavukelambuso kanye nebutho likaHulumeni waseDRC baqhubekile nokulwa.