Iyodwa kwezintathu ingqwele engadla ubhedu ku-EPL

Uvutha bhe umbango wesicoco se-English Premier League (EPL).

Njengamanje umbango uphakathi kwamaqembu amathathu, iManchester City, iLiverpool ne-Arsenal abagaqele isicoco seligi ngezizathu ezahlukene.

AmaReds yiwona aqhwakele esicongweni ngamaphuzu angama-63 ngemuva kwemidlalo engamashumi amabili nesikhombisa.

Endaweni yesibili ihlezi entanyeni amaCitizens aseqoqe amaphuzu angama-62 ngemuva kwemidlalo engamashumi amabili nesikhombisa.

IGunners nayo ayizibekile phansi endaweni yesithathu ngamaphuzu angama-61 emidlalweni engamashumi amabili nesikhombisa.

Womathathu la maqembu athole imiphumela emihle kule mpelasonto esiphuma kuyona.

Kuqale iLiverpool ngoMgqibelo ntambama iqumba phansi iNottengham Forrest ngelilodwa eqandeni ngegoli likaDarwin Nunez eCity Ground. NgeSonto ntambama iCity ithele othulini abakhaya bayo iManchester United ngama-3/1 e-Etihad Stadium kwathi izolo ebusuku eBramall Lane iGunners yaxebula iShefield Wednesday ngayisi-6/0 emdlalweni weligi.

Womathathu amaqembu asalelwe yimidlalo eyishumi nanye ngaphambi kokuthi kusongwe.

ILiverpool eqhwakele ifuna isicoco sayo samashumi amabili seligi kule sizini. Uma engasithola izolingana neMan United enezicoco ezingamashumi amabili.

Ngakolunye uhlangothi i-Arsenal ifuna ukuqeda ishobolo leminyaka engamashumi nanye.

IGunners selokhu yagcina ukudla isicoco seligi ngowezi-2002/03. Kule sizini yadlala isizini yonke ingadliwa.

ICity ngakolunye uhlangothi ibheke ukunqoba isicoco sayo sesine seligi amasizini elandelana.