Kungakapholi maseko aMadzatsatsa asetholana neCitizens koweligi
Kulindeleke ukuthi kuqothuke utshani emdlalweni ophakathi kweSupersport United neCape Town City.
Okuzokwenza lo mdlalo ushube ingoba akukapheli izinsuku ezingakanani la maqembu abetholene phezulu koweNedbank Cup Last 32, lowo mdlalo unqotshwe yiSuperSport United sekukhahlelwa amaphenathi.
Kulokhu la maqembu azobe etholene phezulu koweDStv Premiership, lo mdlalo uzobe useCape Town Stadium ngele-19:30.
Isitobha seSupersport United u-Onismor Bhasera uthe balindele umdlalo ozokuba nzima kakhulu.
“Ngeke kube umdlalo olula neze lona esiya kuwona. Kulezi zinsuku ezedlule sihambe kakhulu, ngoba ngeSonto besifika siphuma ePolokwane ukuyodlala umdlalo wase-Afrika sabuya, sesiya eKapa. Ngaphandle kwalokho iCape Town City siyazi iyiqembu elidlala kahle, ngeke ivume ukuthi siyihlule kulandelana. Kodwa iqiniso lithi siyawadinga amaphuzu amathathu,” kusho uBhasera
UBhasera oneminyaka yobudala engama-38, wengeze ngokuthi kunzima kanjani ukudlala neqembu elilodwa esikhathini esiyisonto elilodwa.
ISupersport United ihlezi endaweni yesithathu kulogi ngamaphuzu angama-30 emva kwemidlalo eli-17, iCape Town City yona ihlezi kweyesibili ngamaphuzu alinganayo umehluko amagoli.
Ngemuva kokukhishwa koweCAF Confederation Cup ngeSonto ngemuva kokudlala ngokulingana ngo 1-1 neModern Future, lo mdlali wasemuva uthe bazokwenza konke okusemandleni ukunqoba iNedbank Cup nokuqeda endaweni yesibili ukuze bathole ithuba lokubuyela ebholeni lase-Afrika ngesizini ezayo.
“INedbank Cup isinika elinye ithuba lokubamba iqhaza kuCAF, ngakho sibheke ngabomvu ukuthi sizame ukuyinqoba. Nakulokhu ukuzama ukwenza kahle kuligi kuzosinika elinye ithuba lokudlala kuCAF ngakho kumele sijahe indawo ephezulu.”
Komunye umdlalo obhekiwe oweLamontville Golden Arrows neSekhukhune United wona uzobe useMpumalanga Stadium, eHammarsdale.
