Zidedele nompempe – Ayicijele ngokwanele impi yeNedbank Cup noSuthu amabutho kaMaduka
Angumqemane wonke amabutho kaJohn Maduka ocija iRoyal AM ezobhekana na-Amazulu emdlalweni wabakhaya baKwaZulu-Natal (KZN) kuLast 32 yeNedbank Cup eKing Zwelithini Stadium, eMlaza kusasa ngelesi-7 ebusuku.
Womabili amaqembu azobanga indawo yeLast 16 yeNedbank Cup emdlalweni okubhekwe ukuthi uhlabahlose eMlazi.
UMaduka opheka iThwihli Thwahla utshele abezindaba ukuthi wonke amabutho akhe akulungele ukuya empini noSuthu eKing Zwelithini.
“Amalungiselelo ahamba kahle kakhulu. Asibanga nesikhathi esanele sokulungiselela lo mdlalo. Ezinsukwini ezedlule besibhekene neKaizer Chiefs emdlalweni weDSTV Premiership. Okuhle wukuthi akekho umdlali othintekile emdlalweni wethu odlule. Bonke bayimiqemane. UDlamini (Mzwandile) nguyena kuphela ongeke abe yingxenye yomdlalo. Unamakhadi amane aphuzi. Ngaphandle kwakhe sineqembu eliphelele esizoqoka kulona isikwati esizogadla ngaso uma sesibhekene na-Amazulu,” kuchaza uMaduka.
IRoyal AM idonsa kanzima kule sizini yeDSTV Premiership okufakazelwa yindawo ehlezi kuyona eligini.
Leli qembu eliphethwe yisiqumama sikasomabhizinisi waseThekwini uShauwn Mkhize liyibambe endaweni ye-14 kulogi.
“Kule sizini iqembu alinawo umgqigqo. Sinqoba umdlalo owodwa bese sidliwa kwemibili noma siguqe bese sidlala ngokulingana. Ngicabanga ukuthi leyo iyona imbangela eyenza sithwale kanzima kule sizini. Sisebenze kanzima njengethimba labaqeqeshi ukuguqula lesi simo,” kuqhuba uMaduka.
NgoZibandlela, uSuthu lulobele iRoyal AM ngo 3-0 eMoses Mabhida Stadium, eThekwini emdlalweni weligi.
“Siwalungele Amazulu. Lona ngumdlalo ohlukile nalo esawudlala koweligi. Sidlala umdlalo womkhumulajezi. Kumele kube neqembu elilodwa elizophumelela. Sizimisele ngokuba yilelo qembu. Ingcindezi ibhekene nabo ngenxa yomphumela abawuthole bebhekene nathi koweligi. Sizowuhlela kahle umdlalo ngoba siyazi sibhekene neqembu eliqinile.” kusho uMaduka.